Syrdarııa ózeniniń jaǵalaýyndaǵy toǵaıly alqaptardy sý alý qaýpi týyndady

TÚRKІSTAN. QazAqparat – Túrkistan oblysynda Syrdarııa ózeniniń jaǵalaýynda ornalasqan toǵaıly alqaptardy sý alý qaýpi týyndady, dep habarlaıdy QazAqparat tilshisi.

Shardara aýdany Tótenshe jaǵdaılar bóliminiń málimetinshe, aýa raıynyń kúrt sýytýyna baılanysty Syrdarııa ózenine joǵarydan 1000 m3 sý túsýde. Sol sebepti ózen boıynda muz qatyp, ózen jaǵasyndaǵy ózekterge sý jaıylýda jáne barlyq magıstraldyq kanaldar arqyly kólderdi sý alyp jatyr.

«Qurmetti jergilikti turǵyndar! Sizderden Syrdarııa ózeniniń jaǵalaýyndaǵy toǵaıly alqapta júrgen maldaryńyzǵa ıelik jasaýlaryńyzdy jáne qaýipsiz aımaqtarǵa aıdap shyǵýlaryńyzdy suraımyz» - delingen Tótenshe jaǵdaılar bólimi tarapynan taratylǵan habarlamada.

Aıta keteıik, budan aldyn Syrdarııa ózeniniń sý deńgeıiniń kóterilýine baılanysty Shardara qoımasyndaǵy sý kólemi de artyp jatqanyn jazǵan bolatynbyz.