Syrdarııa oblysynda ózbek jáne qazaq jastarynyń «Saıhýn» festıvali ótip jatyr

TAShKENT. ÓzA - QazAqparat - Ózbekstandaǵy Syrdarııa oblysynda Ózbekstan jáne Qazaqstan jastarynyń qatysýynda «Saıhýn» festıvali ótýde, dep habarlaıdy QazAqparat ÓzA agenttigine silteme jasap.

Festıvalǵa qatysýshylar túrki jurtynyń uly aqyny hám shyǵystyń oıshyl danyshpany Álisher Naýaı músinine gúl shoqtaryn qoıdy. Oblystyq mýzykalyq drama teatrynyń foıesinde ózbek-qazaq halyqtarynyń tarıhy men qundylyqtary týraly tusaýkeser ótip, ol «Dostyq kópiri» atty kontserttik baǵdarlamamen jalǵasty.

Osy sharadan soń oblys ákimi Gafýrjon Mırzaev qazaqstandyq qonaqtarmen kezdesý ótkizip, óńirde atqarylyp jatqan aýqymdy jumystar, kórshiles eldermen barlyq salada baılanysty nyǵaıtý sharalary, Ózbekstan men Qazaqstan arasyndaǵy dostyq pen yntymaqtastyq qarym-qatynastary týraly málimet berdi.

Kezdesý barysynda jas ónerpazdar eki halyqtyń shyǵarmashylyǵynan jyr músháırasyn uıymdastyryp, dostyq saıys ótkizdi.

Júzdesý sońynda qazaqstandyq qonaqtarǵa «Dostyq» forýmynyń músini men estelik syılyqtary tabys etildi.