Syr óńiriniń 9 nysany ıÝNESKO-nyń tizimine engizildi
Osynaý rýhanı qundylyqtardy dúıim jurt taný úshin aımaqta «Uly Dala eli» tanymdyq ekspedıtsııasy uıymdastyryldy. Oblystyq Qazaqstan halqy Assambleıasynyń ókilderi, tarıhshy-arheologtardan quralǵan top aldymen Janqoja batyr kesenesine táý etti.
Hıýa, Qoqan handyqtary men Reseı otarshyldaryna qarsy ult-azattyq kúres júrgizgen qaharman babanyń kesenesi Qazaly aýdanynda ornalasqan. Kelesi baǵyt Jankent qalashyǵy boldy. Oǵyz memleketiniń astanasy bolǵan shahardyń aýmaǵy 20 gektardaı. Eginshilik pen saýda-sattyǵy órkendegen qalanyń qalyptasýynan rýlyq qaýymdastyq emes, ýrbanızatsııa úderisi baıqalady.
«Óıtkeni qalashyqtaǵy ashylǵan úlken ǵımarattan 20-ǵa jýyq úıdiń orny ashyldy. Ár úıdiń ortasynda mindetti túrde ashyq oshaq bolady. Qalashyqtyń sońǵy ómir súrgen ýaqytynda qalashyq ıslam dinin qabyldaǵan dep te aıtýǵa bolady. Kóptep kezdesip jatyr «Muhammed» degen jazýy bar júzikter shyqty, arabsha jazýy bar birneshe ydystyń qaldyqtary shyqty. Oǵan qosymsha tabylǵan tıyndardan qalashyqtyń sońǵy ómir súrgen kezeńi X ǵasyr ekenin anyqtap otyrmyz. Ekspedıtsııa músheleri shyǵys jastarynyń kóshbasshysy bolǵan Ǵanı Muratbaevtyń memorıaldyq mýzeıine de bas suqty», - deıdi Qorqyt ata atyndaǵy QMÝ ǵylymı qyzmetkeri Seıdáli Bilálov.
Bıyl 115 jyldyǵy atap ótilgen Orta Azııa jastar qozǵalysynyń uıymdastyrýshynyń ómirderegi tańdanys týǵyzdy. Túrli ult pen ulys ókilderinen jınalǵan top, sondaı-aq uly oıshyl Qorqyt ataǵa arnap salynǵan memorıaldyq keshenge baryp, jyraý-qobyzshynyń rýhanı bolmysyna qanyqty.
«Oblystaǵy etnomádenı ortalyqtardyń músheleri Túrkistanǵa, Arystanǵa baryp, osy ekspedıtsııanyń birinshi kezeńine qatysqan. Ekspedıtsııanyń ekinshi kezeńinde biz túrkilerdiń tarıhy, oǵyzdardyń tarıhy, túbi bir túrki qazaq eliniń tarıhı eski qalashyqtarǵa baryp, áserimiz óte jaqsy. Bul bizdiń elimizdiń tarıhy bizdiń jastarǵa úlgi, jastar el tarıhyn bilý kerek. Tarıh taǵylymy arqyly bolashaqqa degen damý tetigin tabý - bul ulttyq biregeıliktiń basty tiregi bolmaq. Túrli etnos ókilderiniń tanymdyq saıahattan túıgeni osy boldy», - oblystyq túrik etnomádenı ortalyǵynyń tóraıymy Gúlchın Geıdarova.