Syr óńirinde qazaq-qyrǵyz aqyndary bas qosty

QYZYLORDA. QazAqparat - Asqar Toqmaǵambetov atyndaǵy mádenıet úıinde «Parasatty poezııa» atty jyr keshi ótti, dep habarlaıdy QazAqparat oblys ákiminiń baspasóz qyzmetine silteme jasap.

Elbasynyń «Bolashaqqa baǵdar: rýhanı jańǵyrý» baǵdarlamasyn júzege asyrý aıasynda Qyzylordada Qyrǵyzstan men elimizdiń ár túkpirinen aqyndar jınalyp, bas qosty.

Igi bastama aldaǵy ýaqytta dástúrli túrde ótkiziletin bolady. Poezııa keshine qatysýshylardy oblys ákimi Qyrymbek Kósherbaev qabyldap, aqyndarǵa shyǵarmashylyq tabys tiledi. Qonaqtardyń qatarynda  baýyrlas qyrǵyz eliniń aqyndary Baqtygúl Chotýrova men Qarbalas Bakırov, Qazaqstannan Ǵalym Jaılybaı, Qazybek Isa, Ertaı Ashyqbaev, Ularbek Dáleıuly, Baqytgúl Babashova, jerlesterimiz Qatıra Jalenova, Qarshyǵa Esimseıitova, Tolybaı Abylaev, Altaı Úsenov, Dúısenbek Aıashuly, Tolqyn Qabylshaeva syndy jıyrmaǵa jýyq aqyn bar.

- Biz - ejelden «Syr eli - jyr eli» atanǵan elmiz. Tuma jyrdyń bastaýyn Qorqyttan alǵan Syr óńiri talaıdy tańdaı qaqtyrǵan,  Syr topyraǵyn ulttyq mádenıet tórinde berik ornyqtyrǵan jyrshy-jyraýlardyń, daraboz aqyndar men shaıyrlardyń mekeni dep maqtan etemiz.  Osy rette, «Parasatty poezııa» jyr keshin Syrda uıymdastyrý Elbasynyń rýhanı jańǵyrý ıdeıasynyń aıasynda tarıhı, rýhanı bolmysymyzdy odan ári asha túsedi, aıqyndaı túsedi dep esepteımin, - dedi oblys ákimi.

Qabyldaýǵa kelgen aqyndar da oblys basshylyǵynyń bul bastamasyna rızashylyqtaryn bildirip, lebizderin jetkizdi.