Syr óńirinde eskertkishterdiń ınteraktıvti kartasy jasalady
Joba tarıhı-mádenı mura obektileriniń 3 D formattaǵy ınteraktıvti kartasy eskertkishterdi qorǵaý mekemesiniń resmı saıtynda ornalastyrylady. Qoldanýshylarǵa da qoljetimdi bolmaq. Sondaı-aq, «Qyzylorda oblysynyń tarıh jáne mádenıet eskertkishterine QR-kod ornatý» jobasy da 1 qarashaǵa deıin tolyq júzege asyrylady. Kezeń-kezeńimen 150 eskertkishke QR-kod taqtaıshalary ornatylady.
«Búginde «Tsıfrlyq Qazaqstan» baǵdarlamasy boıynsha 2 joba júzege asyrylýda. Onyń alǵashqysy - «Qyzylorda oblysynyń tarıhı-mádenı mura obektileriniń 3 D formattaǵy ınteraktıvti kartasyn ázirleý» jobasy. Ol boıynsha jumystar mamyr aıynda bastaldy. Qazirgi tańda dalalyq zertteý, sandyq formattaǵy eskertkishterdiń túsirilimi, kartografııalyq jumystary júrgizilýde. Atalǵan joba osy jyldyń 1 qarashasynda aıaqtalmaqshy», - dedi oblys ákiminiń orynbasary Rýslan Rústemov.
Aıta ketý kerek, «Tsıfrlyq Qazaqstan» baǵdarlamasy aıasynda búginde oblys kitaphanalarynda 5359 kitap (1 289 377 bet) tsıfrly formatqa kóshirilse, «Elektrondy arhıv» aqparattyq júıesi boıynsha 932026 saqtaý birliginiń 10108 paraǵy sandyq júıege engizildi. Arhıv qujattarynyń 92040 saqtaý birliginiń 12 mln. 189 myń 633 paraǵy tsıfrlyq formatqa kóshirilip, saqtandyrý qorlary jasaldy.