Syr óńirinde «Aral» kompressorlyq stantsııasy iske qosyldy

QYZYLORDA. QazAqparat - Tuńǵysh Prezıdenti kúni qarsańynda Qyzylorda oblysy Aral aýdanynyń Sekseýil kenti mańynda kompressorlyq stantsııa iske qosyldy, dep habarlaıdy QazAqparat.

Stantsııanyń ashylý saltanatyna Qyzylorda oblysynyń ákimi Qyrymbek Kósherbaev jáne «QazMunaıGaz» UK» AQ basqarma tóraǵasynyń orynbasary Qaırat Sháripbaev qatysty. Sharany Astanada QR Energetıka mınıstri Qanat Bozymbaev jáne respýblıkanyń gazben qamtamasyz etetin kásiporyndarynyń basshylary tikeleı baılanys arqyly tamashalady.

«Búgin biz Aral óńirinde «Aral» kompressorlyq stantsııasynyń iske qosylý rásimine kýá boldyq. Uly dalanyń qýatyn el ıgiligine jumsaý múmkindigin táýelsiz elimizdiń qarqyndy damyp kele jatqanynyń bir dáleli retinde atap ótýge bolady. «KazTransGaz» AQ qyzmetkerleri bólingen qarjyǵa jeti aıda rekordtyq ýaqyt ishinde óte mańyzdy nysandy iske qosyp otyr. Sonymen qatar, jaqyn arada «Qorqyt ata» kompressorlyq stantsııasy iske qosylady. Táýelsizdik merekesiniń qarsańynda «Qaraózek» kompressorlyq stantsııasynan bastap Astanaǵa qaraı Saryarqa magıstraldy gaz qubyrynyń qurylysy bastalyp, Elordamyzǵa kógildir otyn jetkizý jobasynyń bastalýyna kýáger bolamyz. Osynyń barlyǵy - halqymyzdyń aýyzbirshilik, yntymaǵynyń jáne  Elbasy saıasatynyń arqasynda»,-dedi aımaq basshysy.  

Sondaı-aq, QR Energetıka mınıstri Qanat Bozymbaev qyzylordalyqtardy stantsııanyń iske qosylýymen  quttyqtady.

Esterińizge sala keteıik, Qyzylorda oblysynyń ákimdigi men «QazTransGaz Aımaq» AQ arasyndaǵy memorandýmǵa sáıkes Aral, Qazaly, Shıeli jáne Jańaqorǵan aýdandaryn jáne Baıqońyr qalasyn gazdandyrý jobasy júzege asyryldy. Bıyl QR Energetıka mınıstrliginiń qoldaýymen qalǵan 3 aýdan ortalyǵyn - Josaly, Tereńózek jáne Jalaǵashty gazdandyrý jumystary bastaldy, 2020 jyly barlyq 7 aýdan ortalyǵyn kógildir otynǵa qosý josparlanýda.

Qazirgi tańda óńirde oblys halqynyń 63%-y tabıǵı gazben qamtamasyz etilgen, 2020 jylǵa qaraı gazdandyrýdy 95% - ǵa jetkizý mindeti qoıylǵan.