Syr elinen Astanaǵa 90 tonna kúrish jetkizildi

ASTANA. QazAqparat - Astanada Qyzylorda oblysynyń aýyl sharýashylyǵy ónimderi jármeńkesi ótip jatyr, dep habarlaıdy QazAqparat tilshisi.

Jármeńkege Qyzylorda qalasy men 7 aýdannan 380 tonnaǵa jýyq ónim túrleri jetkizildi.

Onyń ishinde: kúrish - 90 tonna, jylqy, sıyr, qoı eti - 15 tonna, sút ónimderi - 6 tonna, ara baly, balyq - 15 tonna, kókónis, qııar, qyzanaq - 50 tonna, qulpynaı, alma, almurt, órik - 4 tonna, sók, talqan, as tuzy - 1 tonna, baqsha daqyldary (qaýyn, qarbyz, asqabaq) 120 tonna, t.b. ónimder usynyldy.
  

«Jyl saıynǵy dástúrge aınalǵan jármeńkege Syr elinen 400 tonnaǵa jýyq aýyl sharýashylyǵy ónimderin ákeldik. Erekshe aıtyp ketetin sát búginde oblystyń aýyl sharýashylyǵy salasy ásirese sońǵy 5 jylda joǵary kórsetkishterdi kórsetýde.

Oblystyń ishki jalpy óniminiń qurylymyndaǵy aýyl sharýashylyǵynyń úlesi 2,5%-dan 3,7%-ǵa artty, aýyl sharýashylyǵynyń negizgi kapıtalyna salynǵan ınvestıtsııa 22,8 esege ósti. Odan bólek Syr eli kúrishtiń eli ekenin bári biledi. Osy turǵyda aıryqsha aıtyp ótken jón, 2017 jyly oblystyń kúrishshileri 500 myń tonna kúrish jınap kezekti rekord jasady», - dedi Qyzylorda oblysy aýyl sharýashylyǵy basqarmasynyń basshysy Baqyt Jahanov.

Basqarma basshysynyń aıtýynsha oblys qazir negizinen kartop, kókónis, baqsha óndirisin damytýdy qolǵa alýda. Atap aıtqanda, aǵymdaǵy jyly Qyzylorda qalasynda ıspandyq tehnologııa boıynsha avtomattandyrylǵan jylyjaı kesheniniń qurylysy iske qosylady. Budan bólek, 20 jylyjaı salý josparda bar. 

Sonymen qatar aýyl sharýashylyǵy basqarmasynyń basshysy óńirdegi agroónerkásip jaǵdaıy men sol salaǵa tartylatyn ınvestıtsııa máselesine de toqtaldy.

«Ústimizdegi jyly Joldaýda Prezıdent agrarlyqtardyń aldyna 2 strategııalyq maqsat qoıdy: eńbek ónimdiligin túbegeıli ulǵaıtý jáne qaıta óńdelgen ónimderdiń eksportyn arttyrý. Qoıylǵan mindetterge qol jetkizý úshin oblystyń «Agrokartasyn» júzege asyrýdyń 2018-2022 jyldarǵa arnalǵan egjeı-tegjeıli is-sharalar josparyn ázirlep, bekittik. Jalpy, osy is-sharalar jospary sheńberinde aǵymdaǵy jyly jalpy alǵanda quny 7,0 mlrd. teńgeden astam 10 ınvestıtsııalyq jobany iske asyrý bastalady», - dedi B.Jahanov.

Elordanyń 20 jyldyǵyna arnalǵan jármeńke aıasynda halyq arasynda ónimderdiń dámin tatyp kórý sharasy men merekelik kontsert uıymdastyrylýda.