Syr elinde respýblıkalyq báıge ótedi

QYZYLORDA. QazAqparat - 22 sáýirde Qyzylorda oblysynda báıgeden QR chempıonatynyń irikteý kezeńi ótedi. Bul týraly óńirlik kommýnıkatsııalar qyzmetinde ótken brıfıngte oblystyq mádenıet jáne sport basqarmasy basshysynyń orynbasary Asyljan Jamanqul málimdedi, dep habarlaıdy QazAqparat.

- Búginde ıppodrom saıysty ótkizýge tolyq daıyn. Ótken báıgelerge qaraǵanda tirkelgen attar sany kóp. Saıysqa qatysýshy sportshylar top báıge, qunan báıge jáne alaman báıge boıynsha synǵa túsedi. Júlde qory – 35 600 000 teńge. Alaman báıgeniń jeńimpazy Astana Motors kompanııasynyń demeýshiligimen avtokólik minedi. Báıge óte joǵary deńgeıde ótip, halyqtyń kóńilin kóteredi dep senemiz,-dedi Asyljan Zulfqaruly.

- Aýqymdy daıyndyq búginde óz máresine jetti. Báıgeden bólek, qyz-kelinshekterge arnalǵan «Ulttyq kıim – ult ajary» atty kostıýmder baıqaýy ótedi. Bul baıqaýda elýden asa qatysýshy baq synaıdy. Oǵan qatysatyn boıjetkender ulttyq kıimmen shyǵyp, sán-saltanat boıynsha synǵa túsedi. Júlde qory – 1 mln teńge. Sondaı-aq júldesi 500 myń teńgeni quraıtyn qol kúres, arqan tartý, gir kóterýden saıystar ótkiziledi,-deıdi Kazpetrol Group-tyń PR menedjeri Meıramkúl Hodjaeva.

- Bıyl respýblıka boıynsha jeti irikteý kezeńi bolady. Al sońǵy qorytyndy kezeń Jambyl oblysynda ótedi. Birinshi kezeńi 22 sáýir kúni Syr elinde bastaý alady. Qyzylorda oblysynan qyryq at iriktep alyndy. Daıyndyǵy óte jaqsy. Jalpy respýblıka tarapynan 210 shabandoz óz baǵyn synaıdy,-dedi Qyzyloda oblystyq Báıge federatsııasynyń prezıdenti Ádiljan Іztileýov.

Aıta keteıik, shara Qyzylorda oblysy ákimdiginiń qoldaýymen Báıge federatsııasy respýblıkalyq birlestiginiń uıymdastyrýymen ótedi.

Sondaı-aq sharaǵa Kusto group, Compass, Kazpetrol Group kompanııalary qoldaý kórsetedi.