Syr elinde 2025 jylǵa deıin 42 aýyl gazǵa qosylady
2022 jyly 14 gazben jabdyqtaý jobalaryn júzege asyrýǵa 5,8 mlrd teńge bólingen. Onyń ishinde, 4,3 mlrd teńgesi respýblıkalyq, 542 mln teńgesi oblystyq bıýdjetten bólinse, «Aýyl – el besigi» baǵdarlamasy aıasynda – 795,0 mln teńge, «Jumyspen qamtý jol kartasy» baǵdarlamasy aıasynda 257,0 mln teńge qaralǵan.
Jyl basynan bergi 9 aıdyń qorytyndysy boıynsha Qazaly qalasy, Shıeli aýdanynyń Alǵabas, Aqmaıa eldi mekenderin gazdandyrý men Tereńózek kentindegi gazdandyrylmaı qalǵan kóshelerge gaz qubyryn tartý jobalary aıaqtalyp, paıdalanýǵa berildi. Bıylǵy jyldyń ІІ jartyjyldyǵynda Qarmaqshy aýdanyndaǵy Tóretam kenti men Aqaı aýylyn, Aral aýdanyndaǵy Sekseýil kentin gazdandyrý jáne Shıeli aýdanyndaǵy Tartoǵaı eldi mekeninde AGTS ornatý jobalary júzege asyrylýda.
Al, Qyzylorda qalasyna qarasty Naýryz jáne Mahambet eldi mekenderinde 2021 jyly bastalǵan gazdandyrý jobasynyń qurylys jumystary 2023 jylǵa ótpeli jobalardyń qatarynda.
Sonymen qatar aımaq basshysynyń tapsyrmasymen 2022-2025 jyldar aralyǵynda 42 aýyldyq eldi mekendi gaz qubyryna qosý jumystaryn jalǵastyrý josparlanýda.
Aıta ketý kerek, oblys ákimi Nurlybek Nálibaev BAQ-na bergen suhbatynda aýdan ortalyqtary tolyqtaı gazǵa qosylǵanyn jáne oblystyń gazdandyrý deńgeıin bıylǵy jyly 68%-ǵa deıin jetkizý josparlanǵanyn aıtqan bolatyn.
Shynynda, aımaqqa qarasty aýyldyq eldi mekenderin gazdandyrý halyqtyń áleýmettik ahýalyn jaqsartýmen qatar, oblys ekonomıkasyna qosymsha serpin beretini anyq.