Syr dalasynyń tereń tarıhyna arnalǵan elektrondy oqýlyq shyǵarylady
Aıta keteıik, oblys ákiminiń búgingi baspasóz máslıhaty Qyzylorda oblysynda «Rýhanı jańǵyrý» baǵdarlamasy aıasynda atqarylǵan sharalardy baıandap berdi.
«Atap aıtsaq, birinshi - «Tarıhqa tunǵan Syr eli» nemese «Qasıetti Qyzylorda» atty kitap úsh tilde shyǵarylatyn bolady. Ol Syr dalasynyń tereń tarıhy, mádenıeti, ekonomıkalyq jetistigi qamtylatyn fotoalbomdy kitap. Kitapqa AQSh pen Eýropa elderindegi arhıvterden Syr óńiriniń tarıhı oryndary týraly buryn esh jerde jarııalanbaǵan fotoderekter engizilmek», - dedi oblys ákimi Ortalyq kommýnıkatsııalar qyzmetinde.
Budan bólek, Qyzylorda oblysyndaǵy tarıhı jáne mádenı eskertkishter teleatlasy men óńir tarıhy týraly elektrondy oqýlyq nemese jınaq shyǵarylady. Bul joba boıynsha beınemuraǵattarda saqtalǵan Syr óńiriniń tarıhyna, tarıhı-mádenı eskertkishterine qatysty túsirilimder, derekter jınaqtalady. Sonymen birge aımaqtyq «Rýhanı jańǵyrý» ortalyǵy oblysta ornalasqan tarıhı-mádenı eskertkishter men oryndar, ómir súrgen tarıhı tulǵalar, batyrlar men shaıyrlar, jyraýlar, t.b. týraly el aýzynda júrgen áńgimeler men ańyzdardy jınaqtap, beınematerıaldar ázirleıdi.
«Munymen qosa, «Syrym meniń - syrlasym» atty kitap jınaǵy shyǵarylady, kitapta eńbek adamynyń shynaıy beınesi kórsetiledi. Qyzylorda oblysynyń ekonomıkalyq, áleýmettik jáne mádenı damý qarqyny týraly málimet beriledi», - dep naqtylady Kósherbaev.
Sonymen qatar «Baıqońyr jáne kosmos», ıaǵnı ǵarysh álemi týraly kitap ázirlenedi. Aıtý kerek, kosmos taqyryby qazirgi qazaq ádebıetinde múldem kóterilmegen deýge bolady. Osy olqylyqtyń ornyn toltyrý maqsatynda Baıqońyr ǵarysh aılaǵy men kosmos, ıaǵnı ǵarysh álemi taqyryby boıynsha derekter jınaqtaýǵa tarıhshy-ádebıetshi ǵalymdar men arnaıy mamandar jumyldyryldy.