Synyptan tys oqýǵa memleket bóletin qarajat biryńǵaı bilim berý esepshottarynda jınaqtalady

NUR-SULTAN. QazAqparat – Jeke bilim berý vaýcherlerin engizý josparlanyp otyr. Bul týraly Memleket basshysy Qasym-Jomart Toqaev Qazaqstan halqyna Joldaýy barysynda aıtty, dep habarlaıdy QazAqparat tilshisi.

«Tehnıkalyq jáne kásibı bilim beretin oqý oryndary eńbek naryǵynyń naqty suranysyna beıimdelýi jáne elimizdiń jańa ekonomıkalyq baǵdarynyń mindetterine saı bolýy kerek. Ata-analar men oqýshylar alǵan bilimniń jáne ıgergen mashyq-daǵdysynyń sapaly jáne suranysqa ıe bolýy úshin belgili bir deńgeıde jaýapty ekenin sezinýge tıis. Sondyqtan olarmen de únemi áriptestik qatynas ornata bilý kerek. Osy maqsatta jeke bilim berý vaýcherlerin engizý josparlanyp otyr. Balanyń bilim alýyna, onyń ishinde synyptan tys oqýyna memleket bóletin qarajat biryńǵaı bilim berý esepshottarynda jınaqtalady», - dedi Memleket basshysy.

Prezıdenttiń sózine qaraǵanda, muny balalardyń bilim alýyna ınvestıtsııa retinde jumsalatyn alǵashqy maqsatty kapıtaly deýge bolady.

«Bul qadam elimizdiń árbir azamaty úshin birdeı múmkindik qaǵıdatyn is júzinde qoldanýǵa jol ashady. Joǵary bilim salasyndaǵy reformalardy da osy baǵytta júzege asyrǵan jón», - dedi Qasym-Jomart Toqaev.