Synamalarynan dopıng tabylǵan sportshylarǵa qatysty mınıstrlik málimdeme jasady
«Qazaqstan Respýblıkasy Ulttyq Olımpıadalyq komıteti Halyqaralyq Olımpıadalyq komıteti tarapynan aǵzalarynan tyıym salynǵan preparattardyń izi tabylǵan 2008 jáne 2012 jyldardaǵy Olımpıada oıyndaryna qatysqan qazaqstandyq sportshylarǵa qatysty jaza qoldanylǵandyǵy týraly resmı habarlama aldy»,-delingen mınıstrlik taratqan málimetterde.
Atalmysh aqparat Halyqaralyq Olımpıadalyq komıtettiń resmı saıtynda da jarııalandy. Halyqaralyq Olımpıadalyq komıtetiniń tártiptik komıssııasy 2008 jyly Beıjiń Olımpıadasyna qatysqan sportshylardyń «A» jáne «V» dopıng synamalaryn qosymsha tekserý qorytyndysy boıynsha qazaqstandyq erkin kúres palýany, kúmis júldeger Taımýraz Tıgıevti sol oıyndardan shettettip, kórsetken nátıjeleriniń kúshin joıyp, nagradalaryn qaıtaryp alý týraly sheshim shyǵardy.
2012 jyly London Olımpıadasyna qatysqan sportshylardyń synamalaryn tekserý qorytyndysy boıynsha tártiptik komıssııa qazaqstandyq aýyr atletter Svetlana Podobedova, Zýlfııa Chınshanlo, Maııa Manezany sol Oıyndardan shettetti. Sonymen qatar, komıssııa sportshylardyń nátıjeleriniń kúshin joıyp, nagradalaryn qaıtaryp alý týraly sheshim shyǵardy.
«Sportshylarǵa qoldanylatyn jazalardyń merzimin tıisti halyqaralyq federatsııalar anyqtaıdy. Bul másele boıynsha QR Mádenıet jáne sport mınıstrligi QR Ulttyq Olımpıada komıtetimen birlesip jaqyn ýaqytta, osyndaı jaǵdaılarmen jumys júrgizip otyrǵan shet memleketterdiń tájirıbelerimen tanysatyn bolady. Jáne de máseleniń zańnamalyq aspektilerin qarastyrady»,-dep habarlady mınıstrliktiń resmı saıty.
«Ádil sport» qaǵıdalary men «taza» sportshylardy qorǵaý jáne dopıngti qoldanýǵa «nóldik tózimdilik» saıasatyn qoldaý - Qazaqstan Respýblıkasynyń sport salasyndaǵy basty baǵyty».