Sychýan arada 42 jyl ótkende otbasyndaǵy bala sanyna qoıylǵan shekteýdi alyp tastady

ASTANA. QazAqparat – Qytaıdyń Sychýan provıntsııasynyń bıligi ár otbasyndaǵy bala sanyna qoıylǵan shekteýlerdi alyp tastady. Bul - eldegi týý kórsetkishiniń tómendeýimen kúresýge baǵyttalǵan shara, dep habarlaıdy QazAqparat VVS-ge silteme jasap.

Sonymen qatar, provıntsııa úkimeti budan bylaı nekesiz bala týǵan áıelder de resmı tirkeýge alynyp, erli-zaıyptylar sııaqty jeńildikterdi ala alady dep sheshti.

Qytaı zańy kúıeýge shyqpaǵan áıelderdiń bala týýyna tyıym salmaıdy, biraq onda kórsetilgendeı, zań turǵysynan nekeli áıel ana atanady.

Budan bylaı Sychýan provıntsııasynda turmysqa shyqpaǵan kez kelgen áıel bala týǵysy kelse, medıtsınalyq kómekke, mektepten oryn alýǵa jáne aqshalaı tólemderge júgine alady.

Qytaı bıligi neshe jyldan beri «bir otbasynda – bir bala» saıasatynyń saldarynan paıda bolǵan keleńsiz demografııalyq úrdisti ózgertýge tyrysyp keledi.

Ótken jyly Qytaı halqynyń sany sońǵy 60 jylda alǵash ret qysqardy. Burynǵy halyq sanynyń azaıýy Mao Tszedýnnyń ekonomıkalyq eksperımentine baılanysty boldy, ol jappaı asharshylyq pen ólim-jitimniń artýyna ákelgen.

23 qańtarda Qytaı úkimeti 2022 jyly Qytaıda 9,56 mıllıon adam dúnıege kelip, 10,41 mıllıon adam qaıtys bolǵanyn kórsetetin statıstıkalyq málimet jarııalady.

Halyq sany kemýiniń bir sebebi – qala turǵyndarynyń kóbi nekege turýdy jáne balaly bolýdy keıinge qaldyrýda.

Qytaı Ulttyq statıstıka bıýrosynyń basshysy Kan Idiń aıtýynsha, «bul - balaly bolǵysy keletinderdiń azaıýynyń, nekege turý men júktilikti keıinge qaldyrýdyń jáne elde bala týý jasyndaǵy áıelder sanynyń azaıýynyń nátıjesi».

Sonymen qatar, «bir otbasynda – bir bala» saıasatynyń jemisi. Ol 1980 jyldyń qyrkúıeginde el halqynyń baqylaýsyz ósýin azaıtý maqsatynda engizilgen.

Alaıda onyń nátıjesi Qytaı halqynyń genderlik qatynasynyń erlerdiń paıdasyna aýysýy boldy.

Foto: bbc.com