Sybaılas jemqorlyqty qabyldaýdyń álemdik ındeksi jarııalandy
2022 jyldyń qorytyndysy boıynsha Qazaqstan Albanııa, Ekvador, Panama, Perý, Serbııa, Shrı-Lanka, Taıland jáne Túrkııamen pozıtsııany bólisip, 36 ball jınady.
Qazaqstan buǵan deıingideı 9 derekkóz negizinde baǵalandy. Eki reıtıngilik agenttiktiń sarapshylary qabyldanyp jatqan sybaılas jemqorlyqqa qarsy sharalardyń baǵalaryn kóterdi, tórt agenttiktiń sarapshylary óz baǵalaryn tómendetti, qalǵan úsheýi – baǵalaryn ótken jyldyń deńgeıinde saqtap qaldy.
Bıylǵy jyly jahandyq zertteýdiń negizgi taqyryby – azamattardy qorǵaýǵa, quqyqtyń ústemdigin qamtamasyz etýge jáne beıbitshilikti saqtaýǵa jaýapty ınstıtýttardy qajetti resýrstardan aıyratyn bıýdjet qarajatyn maqsatsyz paıdalaný, ysyrap etý nemese urlaý.
Kóshbasshy elder Danııa (90 ball), Fınlıandııa jáne Jańa Zelandııa (87 ball) boldy. Ońtústik Sýdan, Sırııa jáne Somalı sybaılas jemqorlyqty qabyldaý ındeksiniń reıtınginde sáıkesinshe 13, 13 jáne 12 baldarymen sońǵy oryndardy alady.
Qatar (58 ball), Gvatemala (24 ball) jáne Ulybrıtanııa (73 ball) sııaqty 26 el bıylǵy jyly eń tómengi deńgeıge jetti.
2017 jyldan bastap on eldiń CPI kórsetkishteri aıtarlyqtaı tómendedi: Lıýksembýrg (77 ball), Kanada (74 ball), Ulybrıtanııa (73 ball), Avstrııa (71 ball), Malaızııa (47 ball), Mońǵolııa (33 ball), Pákistan (27 ball), Gondýras (23 ball), Nıkaragýa (19 ball) jáne Gaıtı (17 ball).
Segiz el CPI reıtıngin jaqsarta aldy: Irlandııa (77 ball), Ońtústik Koreıa (63 ball), Armenııa (46 ball), Vetnam (42 ball), Maldıv araldary (40 ball), Moldova (39 ball), Angola (33 ball) jáne Ózbekstan (31 ball).
Óńirlik bóliniste Batys Eýropa elderi men Eýropalyq Odaq úzdik boldy, olarda sybaılas jemqorlyqty qabyldaý deńgeıiniń ortasha baly – 66 ball. Eń az ball jınaǵan aımaqtar – Saharanyń ońtústigindegi Afrıka (32 ball) jáne Shyǵys Eýropa men Ortalyq Azııa (35 ball). Qazaqstan ECA (Eýropa jáne Ortalyq Azııa) elder tobynda baǵalandy.
Shyǵys Eýropa men Ortalyq Azııa aımaǵynda 19 el baǵalandy: Grýzııa (56 ball), Armenııa (46 ball), Chernogorııa (45 ball), Kosovo (41 ball), Soltústik Makedonııa (40 ball), Belarýs (39 ball), Moldova (39 ball), Albanııa (36 ball), Qazaqstan (36 ball), Serbııa (36 ball), Túrkııa (36 ball). Odan keıin Bosnııa men Gertsegovına (34 ball), Ýkraına (33 ball), Ózbekstan (31 ball), Reseı (28 ball), Qyrǵyzstan (27 ball), Tájikstan (24 ball), Ázirbaıjan (23 ball) jáne Túrikmenstan (19 ball) boldy.
Halyqaralyq sarapshylar bıylǵy nátıjeler álemniń kóptegen elderi áli de sybaılas jemqorlyqqa qarsy kúreste tabysqa jete almaıtynyn kórsetedi degen qorytyndyǵa keldi: 2017 jyldan bastap olardyń 95 paıyzy is júzinde eshqandaı oń dınamıkany kórsetpedi.
Qosymsha aqparatty myna saıttan alýǵa bolady.
Aıta ketsek, jemqorlyqty qabyldaý ındeksi boıynsha Qazaqstan alǵash ret 2020 jylǵy kórsetkishterimen 19 pozıtsııa joǵary kóterilgen bolatyn.