Sybaılas jemqorlyqpen kúres qyzmeti memqyzmetshilerdi para berip tekseredi

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń basshylyǵy memqyzmetshilerdiń adaldyǵyn tekserý tásilderi týraly aıtyp berdi, dep habarlaıdy QazAqparat tilshisi.

Agenttik tóraǵasynyń orynbasary Oljas Bektenovtyń aıtýynsha, memlekettik qyzmetshilerdiń adaldyǵyn tekserýdiń jańa tásilderi ishinde «Itegrity-check» degen bastama bar.

«Máselen, sybaılas jemqorlyq qaýpi bar laýazymdar bolady. Al ondaı qyzmette otyrǵan adamdardy tekserip turý qajet. «Itegrity-check» aıasynda olarǵa zańsyz syıaqy alýǵa usynys jasalady. Eger memqyzmetker ondaı usynysqa kelisim berse, onda memlekettik qyzmetten shettetiletin bolady», - dedi O.Bektenov memlekettik qyzmetti jańa formatta qalyptastyrýǵa arnalǵan paneldik sessııada.

Budan bólek, QR Memlekettik qyzmet isteri jáne sybaılas jemqorlyqqa qarsy is-qımyl agenttigi zańsyz baıyǵany úshin jaýapkershilik engizýdi josparlap otyr. Ekonomıkalyq yntymaqtastyq jáne damý uıymy da soǵan basymdyq berip otyr. Al BUU Jemqorlyqqa qarsy konventsııasynda naqty talap bar.

«Konventsııanyń 20-babynda zańsyz baıyǵany úshin jaýapkershilikti engizý mindeti jazylǵan. Qazaqstan atalǵan qujatty 2008 jyly ratıfıkatsııalaǵan bolatyn. Osyǵan baılanysty búginde biz osy ıdeıany jan-jaqty damytyp, basqa memlekettik organdarmen birlesip jumys istep jatyrmyz. 2020 jyly kirister men shyǵystardy jalpyǵa ortaq deklaratsııalaý engiziletini belgili. Sonyń aıasynda zańsyz baıyǵany úshin jaýapkershilikti engizgen durys dep sanaımyz. Máselen, sheneýniktiń shyǵystary kirisinen artyq bolsa, belgili bir jaýapkershilik qarastyrylýy shart», - deıdi O.Bektenov.