Sybaılas jemqorlyqqa qarsy shekteý qabyldaıtyn tulǵaǵa syılyq berýge tyıym salynbaq
Ol búgin Májilistiń jalpy otyrysynda «QR keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn tanystyrǵan bolatyn. Qujatta túzetýlerdiń 3 blogy qarastyrylǵan.
«Birinshi blok - sybaılas jemqorlyq kórinisterin júıeli túrde aldyn alý boıynsha qosymsha tetikterdi engizýge baǵyttalǵan. Atap aıtqanda, Azamattyq kodekstiń erekshe bóliminde syıǵa tartýshynyń paıdasyna is-áreketteri úshin ózine sybaılas jemqorlyqqa qarsy shekteýler qabyldaıtyn tulǵalarǵa kez kelgen quny bar syılyqtar syıǵa tartýǵa tyıym salý usynylady. Azamattyq kodekstiń «Syıǵa tartý» atty 509-baptyń qoldanystaǵy redaktsııasyna sáıkes, memlekettik qyzmetshilerge quny 10 aılyq eseptik kórsetkishke deıingi syılyqtardy syıǵa tartý múmkindigine jol beriledi. Osyǵan baılanysty Konstıtýtsııalyq keńes 2018 jylǵy 5 maýsymdaǵy óziniń Joldaýynda atalǵan bapty qoldanystaǵy zańnamaǵa sáıkes keltirý qajettigin tikeleı kórsetti», - deıdi tóraǵanyń birinshi orynbasary.
Onyń atap ótýinshe, ekinshiden, «Sybaılas jemqorlyqqa qarsy is-qımyl týraly» Zańda sybaılas jemqorlyqqa qarsy shekteýler qabyldaıtyn tulǵalardyń otbasy músheleriniń materıaldyq syıaqy, syılyqtar nemese kórsetiletin qyzmetterdi qabyldaýyna tyıym salynady.
Úshinshiden, memlekettik laýazymǵa ne memlekettik nemese olarǵa teńestirilgen mindetterdi atqarýǵa baılanysty laýazymǵa úmitker bolyp tabylatyn tulǵalar úshin uıymnyń basshylyǵyn osy uıymda jumys isteıtin jaqyn týystary, jubaıy nemese jekjattary týraly jazbasha nysanda habardar etý mindettemeleri engiziledi.
«Tórtinshi, memlekettik bıýdjetten jáne Ulttyq qordan qarjylandyrylatyn jobalardy irikteý men iske asyrýǵa, satyp alýdy uıymdastyrý men ótkizý jónindegi sheshimder qabyldaýǵa jaýapty kvazımemlekettik sektor sýbektileriniń derbes qurylymdyq bólimsheniń basshysynan tómen emes laýazym atqaratyn ýákiletti qyzmetkerlerin sybaılas jemqorlyq sýbektilerine jatqyzý usynylady. Besinshi, kvazımemlekettik sektor uıymdarynda parasattylyqtyń korporatıvtik standarttaryn saqtaýǵa jaýapty sybaılas jemqorlyqqa qarsy komplaens-qyzmetter ınstıtýty engizilýde», - deıdi Oljas Bektenov.