Sybaılas jemqorlyqqa qarsy sharalardy baqylaýdy júıege keltirý kerek

ASTANA. QazAqparat - Elimizdiń oblystaryndaǵy keıbir máslıhattar sybaılas jemqorlyqqa qarsy baǵdarlamaǵa qatysty sharalardy tıisti deńgeıde atqaryp otyrǵan joq. Bul týraly búgin «Nur Otan» partııasy janyndaǵy Jemqorlyqqa qarsy is-qımyl respýblıkalyq qoǵamdyq keńesiniń otyrysynda 2015-2025 jyldarǵa arnalǵan Sybaılas jemqorlyqqa qarsy is-qımyl baǵdarlamasynyń oryndalýyn talqylaý kezinde QR Parlamenti Májilisiniń depýtaty, atalǵan keńestiń múshesi Tólegen Ibraev málim etti.

Onyń sózine qaraǵanda, sońǵy kezde bul baǵytta Aqmola oblysynyń máslıhaty jumysyn jandandyrdy. Alaıda, tórt jylda sybaılas jemqorlyqqa qarsy is-qımyl máseleleri oblystyń 20 máslıhatynda tek 6 otyrysta ǵana qaralǵan. Sonymen qatar Pavlodar oblysynyń máslıhattarynda baǵdarlamany júzege asyrýdyń kezeńinde óńirde jemqorlyqqa qarsy sharalar 2 ret qarastyrylǵan. Barsha máslıhattardyń qaýlylary eshteńeni de ashyp otyrǵan joq jáne mindettep otyrǵan joq.

Budan bólek, T. Ibraev keıbir óńirlerde sybaılas jemqorlyqqa qarsy sharalardy oryndaýǵa bólingen qarjyny ıgerýde de kemshilikter bar ekendigin atap ótti.

«Sybaılas jemqorlyqqa qarsy is-qımyldar boıynsha jalǵan esepter Astanaǵa jiberiledi. Bul turǵyda keıinnen jalpyrespýblıkalyq kórsetkishter shyǵarylady», - dedi ol.

Osy oraıda ol kóptegen máslıhattar sybaılas jemqorlyqqa qarsy sharalarǵa qatysýy tıisti deńgeıde emes ekendigin jetkizdi.

Degenmen de ol elimizdiń oblystarynda atqarylyp jatqan sharalar qanaǵattanarlyq ekenin, alaıda bul sharalardy kórsetý, júıege keltirý, isterdi baqylaýdy jandandyrý kerektigin atap ótti.

«Jumystar atqarylyp jatyr. Biraq, olardy júıege keltirý qajet», - dedi ol.