Sybaılas jemqorlyqqa qarsy qyzmet ókiliniń atyn jamylǵan alaıaq ustaldy
«QR Sybaılas jemqorlyqqa qarsy is-qımyl agenttiginiń Ózindik qaýipsizdik departamenti Qyzylorda jáne Túrkistan oblystyq departamenttermen birlesip, alaıaqtyq áreket jasaý kúdigine ilingen azamat M.Tashovtyń zańsyz áreketine tosqaýyl qoıdy. Ol ózin Sybaılas jemqorlyqqa qarsy qyzmettiń qyzmetkeri retinde tanystyryp, eski úlgidegi jasandy qyzmettik kýálikti qoldanǵan»,- delingen agenttiktiń Telegram paraqshasynda jarııalanǵan aqparatta.
Vedomstvo málimetinshe, 14 mamyrda Tashov ózin Arman Imanbaev degen oıdan shyǵarylǵan esimmen Sybaılas jemqorlyqqa qarsy qyzmettiń qyzmetkeri retinde tanystyryp, azamat M-niń telefonyn alaıaqtyq jolmen ıemdengen. Keıin kúdikti boı tasalaǵan. Osydan keıin zardap shegýshi Sybaılas jemqorlyqqa qarsy qyzmettiń Qyzylorda oblystyq departamentine habarlasqan.
«Onyń ótinishi QR Qylmystyq kodekstiń 190-babynyń 1-bóligi boıynsha Sotqa deıingi tergep-tekserýdiń biryńǵaı tizilimine (SDTBT) tirkeldi. Sol kúni saǵat 22:00-de jedel-izdestirý sharalarynyń barysynda Túrkistan qalasyna kire beriste Túrkistan oblysy Jetisaı aýdanynyń týmasy, jumyssyz Meıirhan Temirtaıuly Tashov ustaldy. Odan Tashovtyń fotosy japsyrylǵan, ofıtserdiń oıdan shyǵarylǵan esimimen jalǵan qyzmettik kýálik tárkilendi. Osy adamnyń zańsyz áreketterinen zardap shekken azamattardy Sybaılas jemqorlyqqa qarsy qyzmettiń 1424 Call-ortalyǵyna habarlasýdy suraımyz»,- dedi agenttikten.