Sybaılas jemqorlyqqa qarsy qyzmet áleýmettik jelilerde jańa jobalardy iske qosty
«2020 jyly agenttik áleýmettik jelilerde «AntikorNews», «AntikorLive», «Agenttik qyzmetkeriniń bir kúni» jáne «AntikorCase» sııaqty áleýmettik jeli qoldanýshylary arasynda oń pikirge ıe bolǵan birqatar perspektıvalyq jobalardy iske qosty», - dedi Perızat Sádýaqas agenttiktiń Facebook alańynda ótken brıfıng barysynda.
Onyń aıtýynsha, eksklıýzıvti kontenti bar erekshe «AntikorNews» medıa-jobasy agenttiktiń BAQ-pen jáne jurtshylyqpen ózara is-qımylynyń mańyzdy quralyna aınalǵan. Ol sybaılas jemqorlyqqa qarsy kontenttiń úzdiksiz onlaın kórsetilimin qamtamasyz etip, sondaı-aq antıkor qyzmetiniń nátıjeleri men basymdyqtary týraly jedel habarlap otyrady. Al «AntikorLive» medıa-jobasy parasattylyq ıdeologııasyn túsindirýge jáne qoǵamda sybaılas jemqorlyqqa qarsy mádenıetti qalyptastyrýǵa baǵyttalǵan. Budan bólek, joba aıasynda sybaılas jemqorlyqqa qarsy is-qımyl salasyndaǵy memleket saıasatynyń túrli aspektileri únemi jarııalaıdy.
«Agenttik belsendilikti arttyrý úshin Instagram paraqshasynda jańa aıdarlar ashty. Aýdıtorııany tartý úshin «Siz bilesiz be?», «AntıkorTalanttary», «Ulylardyń qanatty sózderi», «Kún sany», «Mıf jáne shyndyq» aıdarymen tanymdyq jáne anımatsııalyq posttar, beınerolıkter jarııalandy. Sondaı-aq, agenttik arnaıy poshta markasy men Elbasynyń sybaılas jemqorlyqqa qarsy kúres týraly qanatty sózderi bar poshta konvertterin shyǵarǵan alǵashqy memlekettik organ bolǵanyn atap ótken jón», - dedi Perızat Sádýaqas.