Sybaılas jemqorlyqqa qarsy kúres agenttigi óz kásipodaǵyn qurdy
Agenttik apparatynyń jetekshisi Saıan Axmetjanovtyń aıtýynsha, atalǵan bastamany qyzmetkerler ózderi kóterdi. Agenttik basshysy oǵan aralasqan joq. "Memlekettik qyzmet isteri jáne sybaılas jemqorlyqqa qarsy kúres agenttiginiń negizgi mıssııasy - kásibı memlekettik apparatty qurý. Al kásibı memlekettik apparatty qurý máselesi eńbek quqyqtaryn saqtaýmen tikeleı baılanysty. Sondyqtan agenttikte kásipodaqtyń qurylǵany oryndy dep sanaımyz. Ony agenttiktiń bir top qyzmetkeri óz bastamasymen quryp otyr. Oǵan basshylyq ta, basqalar da aralasqan joq. Biz qarsylyq ta bildirgen joqpyz. Óıtkeni ol - árbir azamattyń jeke quqyǵy. Elbasy aıtqandaı, kásipodaq - ol turaqtylyqtyń tiregi. Sol sebepti kásipodaq turaqtylyqtyń kúsheıýine, memlekettik qyzmettiń ashyqtyǵy men ádilettigin saqtaýǵa óz úlesin qosady degen úmit bar", - dedi S.Axmetjanov Astanada ótken baspasóz máslıxatynda.
Onyń sózine qaraǵanda, aldaǵy ýaqytta kásipodaqqa kirgen qyzmetkerler sanatorlyq-kýrorttyq demalysqa bara alady. Materıaldyq kómek te bolady. "Atalǵan qurylym merıtokratııa negizderin kúsheıtip, qyzmetkerlerdiń quqyqtaryn jan-jaqty qorǵasa, quba-qup. Biz ondaı bastamalardy qoldaımyz", - dep atap S.Axmetjanov.
Aıta keteıik, aldaǵy ýaqytta QR Memlekettik qyzmet isteri jáne sybaılas jemqorlyqqa qarsy kúres agenttigi óz qyzmetkerleri úshin ıkemdi jumys kestesin engizýdi josparlap otyr. Atalǵan bastama oń nátıje berse, ondaı keste barlyq memlekettik organdarǵa taratylady.