Sybaılas jemqorlyqqa qarsy agenttik «QazAvtoJoldaǵy» problemalardy atady

NUR-SULTAN. QazAqparat - QR Sybaılas jemqorlyqqa qarsy is-qımyl agenttigi Preventsııa departamenti dırektorynyń mindetin atqarýshy Anar Jarova «QazAvtoJoldaǵy» júıeli problemalardy atady, dep habarlaıdy QazAqparat tilshisi.

«Osy jyldyń mamyrynda agenttik «QazAvtoJol» ulttyq kompanııasynyń qyzmetine saraptama júrgizip, júıeli problemalardy anyqtady. Eń aldymen satyp alýlar protsedýrasy táýekeli joǵary aımaq sanalady. Bul jerde sheshim qabyldaý protsesi jabyq ári aıqyn emes dep sıpattalady jáne qoǵamdyq baqylaý qamtamasyz etilmegen», - dedi ol avtomobıl joldary salasyndaǵy problemalar talqylanǵan keńeste.

Onyń aıtýynsha, tenderlik komıssııanyń quramyna qoǵam ókilderi jol qurylys jáne jóndeý jumystary boıynsha kelisimsharttyń somasy 2 mlrd teńgeden asyp ketken jaǵdaıda ǵana qosylyp otyrǵan.

«Bul kompanııanyń ishki erejesiniń talaby. Bizdińshe, mundaı krıterıı asyra silteýshilik. Qarapaıym ǵana mysal, osy jyldyń birinshi toqsanynda tenderlik komıssııanyń jumysyna qoǵamdyq uıymdardan baıqaýshylar birde-bir konkýrsqa qatyspaǵan. Sebebi ótkizilgen tenderdiń barlyǵynda kórsetilgen soma 2 mlrd teńgeden tómen bolǵan. Tenderlik komıssııa qyzmetiniń máseleleri de laıyqty deńgeıde rettelmegen. Onyń quramyn bekitý boıynsha sheshim qabyldaý merzimi men tártibi belgilenbegen. Komıssııa quramyna múshe qabyldaýdyń krıterııleri men negizdemeleri joq. Іs júzinde komıssııa quramy tapsyrys berýshi basshysynyń bilgeninshe jasaqtalyp otyrǵan», - dedi Anar Jarova.