Sybaılas jemqorlyq: Jambylda bıyl 93 qylmystyq is sotqa joldanǵan
Bul týraly Óńirlik kommýnıkatsııalar qyzmetinde ótken brıfıngte QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamentiniń basshysy Ádilhan Áshirbaev aıtty.
«Atap aıtqanda, aǵymdaǵy jyldyń 9 aıynda Departament 93 (2018 – 62) qylmystyq isti sotqa joldaǵan bolsa, 89 (2018 – 40) tulǵa qylmys jasaǵany úshin qylmystyq jaýapqa tartylǵan. Sonymen birge, qylmystyq quqyq buzýshylyqtar jáne basqa da zań buzýshylyqtar jasaýǵa yqpal etken mán-jaılardy joıý jóninde memlekettik organdarǵa 151 usynym joldandy, onyń 80-i qaralyp, 88-i ártúrli sanattaǵy laýazymdy tulǵalar tártiptik jazaǵa tartyldy»,-dedi departament basshysy.
Aǵymdaǵy jyldyń 9 aıynda Jambyl oblysynda 53 jergilikti atqarýshy organnyń laýazymdy tulǵalaryna qatysty sybaılas jemqorlyq sıpatyndaǵy qylmystyq is tirkelgen. Salystyrmaly túrde aıtar bolsaq, ótken jyly dál osyndaı merzimdegi bul kórsetkish 34-ti quraǵan bolatyn. Bul oraıda 13 fakt óńirde oryn alǵan bolsa, aýdandar men qala boıynsha 10 adam jaýapqa tartylǵan.
Brıfıngte Transparency International Kazakhstan qoǵamdyq qorynyń elimizdegi jemqorlyqtyń deńgeıin anyqtaýǵa arnalǵan zertteý jumystary týraly da aıtyldy. Máselen, memlekettik qurylym qyzmetkerleri qanshalyqty sybaılas jemqorlyqqa qatysy bar eken degen saýalda oblys boıynsha basshylar 50 paıyz bolsa, mamandar - 64 paıyzdy kórsetken.
Sybaılas jemqorlyq qylmystarynyń aldyn alý boıynsha osy ýaqytqa deıin túrli profılaktıkalyq jumystar júrgizilgen. Osyǵan qaramastan qoǵamda bul sanattaǵy qylmystar tyıylar emes. Bul bir memlekettik qurylymnyń ǵana emes, jalpy qoǵam bolyp qarsy shyqqanda ǵana joıylatyn áreket deıdi, sala mamandary.