Sybaılas jemqorlyq faktileri jıi tirkeletin memorgandar ataldy

NUR-SULTAN. QazAqparat - QR Sybaılas jemqorlyqqa qarsy is-qımyl agenttiginiń Strategııa jáne jedel basqarý departamentiniń basshysy Nurlan Jaqsymbetov sybaılas jemqorlyq qylmystary jıi kezdesetin memorgandardy atady, dep habarlaıdy QazAqparat tilshisi.

«2021 jyldyń birinshi toqsanynda Syıbaılas jemqorlyqqa qarsy qyzmet 452 qylmystyq quqyq buzýshylyq tirkeldi. Onyń 76 paıyzy sybaılas jemqorlyq faktileri. Asa aýyr quramdy qylmystar sany ósip otyr», - dedi N. Jaqsymbetov onlaın rejımdegi brıfıngide.

Onyń aıtýynsha, qylmystardyń basym bóligi paraqorlyq pen jymqyrý faktilerine tıesili.

«Sybaılas jemqorlyq qylmystary boıynsha 412 adam qylmystyq jaýapkershilikke tartyldy. Sonyń arasynda 42 adam, ıaǵnı 10 paıyzy respýblıkalyq jáne oblystyq deńgeıdegi basshylar. Sybaılas jemqorlyq qylmystarynyń basym bóligin burynǵysynsha jergilikti atqarýshy organdardyń qyzmetkshileri, polıtsııa jáne kvazımemlekettik sektor qyzmetkerleri jasap otyr. Bul óz kezeginde túsinikti jaǵdaı, memlekettik qyzmetshilerdiń basym bóligi ákimdikter men ishki ister organdaryna tıesili ekeni belgili», - dedi departament basshysy.

Nurlan Jaqsymbetovtyń sózine qaraǵanda, kedendik baqylaý organdarynyń qyzmetkerleri arasynda jemqorlyq faktileri jıi kezdesedi. Bul salada 85 adam qylmystyq jaýapkershilikke tartyldy.

Budan bólek, bilim salasynda 32 adam, densaýlyq saqtaý men qurylys salalarynda 27 adam jazalandy.