Sybaılas jemqorlyq faktileri týraly habarlaǵandarǵa qansha syıaqy beriledi

ASTANA. QazAqparat – Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı sybaılas jemqorlyq faktilerin habarlaǵan nemese ózge de joldarymen kómek kórsetkenderge syıaqy berýdi kózdeıtin buıryqqa qol qoıdy, dep habarlaıdy QazAqparat tilshisi.

Qujatta jazylǵandaı, jemqorlyq qylmystaryn anyqtaýǵa kómektesken aqparat úshin birjolǵy aqshalaı syıaqy myna mólsherlerde belgilendi:

- sybaılas jemqorlyq quqyq buzýshylyqtar týraly ákimshilik ister

boıynsha - 30 AEK (103 500 teńge);

- onsha aýyr emes sybaılas jemqorlyq qylmystar týraly qylmystyq

ister boıynsha - 40 AEK (138 000 teńge);

- aýyrlyǵy ortasha sybaılas jemqorlyq qylmystar týraly qylmystyq ister boıynsha - 50 AEK (172 500 teńge);

- aýyr sybaılas jemqorlyq qylmystar týraly qylmystyq ister boıynsha - 70 AEK (241 500 teńge);

- asa aýyr sybaılas jemqorlyq qylmystar týraly qylmystyq ister

boıynsha - 100 AEK (345 000 teńge).

«Para nemese keltirilgen zalal somasy nemese usynylǵan jeńildikter nemese kórsetilgen qyzmetter quny 1 000 AEK-ten asatyn sybaılas jemqorlyq quqyq buzýshylyqtar boıynsha birjolǵy aqshalaı syıaqy para nemese keltirilgen zalal nemese usynylǵan jeńildikter nemese kórsetilgen qyzmetter somasynyń 10 paıyzy, biraq 4 000 AEK-ten kóp emes», - delingen qujatta.

Buıryq alǵash jarııalanǵannan 10 kún ótip baryp, 15 qyrkúıekte kúshine enedi.