«Sybaǵaǵa» bólingen mıllıondardy talan-tarajǵa salǵan sharýa qojalyqtary anyqtaldy

NUR-SULTAN. QazAqparat - «Sybaǵa» baǵdarlamasyna bólingen 230 mıllıonnan astam teńgeni talan-tarajǵa salǵan sharýa qojalyqtary anyqtaldy. Bul týraly QR QM Qarjy monıtorıngi komıtetiniń tóraǵasy Janat Elımanov aıtty, dep habarlaıdy QazAqparat tilshisi.

«Pavlodar oblysynda «Sybaǵa« memlekettik baǵdarlamasy aıasynda iri qara mal satyp alýǵa sýbsıdııa túrinde bólingen 233 mln teńgeni sharýa qojalyqtarynyń talan-tarajǵa salý faktisi anyqtaldy. Tergeý barysynda kúdiktiler 96 mıllıon teńgeden astam qarajatty qaıtardy», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Janat Elımanovtyń atap ótýinshe, mundaı jedel aldyn alý sharasy óz tıimdiligin kórsetip otyr. Sondyqtan aldaǵy ýaqytta munaı men munaı ónimderi, shetelge kapıtaldy zańsyz jylystatý salalarynda kólegeıli aınalymǵa qarsy turýǵa baǵyttalǵan aldyn alý sharalary qolǵa alynatyn bolady.

Munan bólek, komıtet tóraǵasy «Mańǵystaýmunaıgaz» qyzmetkerlerine qatysty qozǵalǵan qylmystyq iske de toqtalyp ótti.

«Mańǵystaýmunaıgaz» AQ Quqyqtyq qamtamasyz etý departamentiniń basshysy Beısenbınge, onyń orynbasary Dáýlenbaevaǵa, sonymen qatar azamat Lısovoıǵa qatysty is tergelip jatyr. Olar jalǵan kelisimsharttar jasaý arqyly 450- mln teńgeden astam qarjyny urlaý kúdigine ilikken», - dedi Janat Elımanov.