«Sybaǵa» baǵdarlamasy aıasynda 70 mln teńgege deıin nesıe rásimdeýge bolady

TÚRKІSTAN. QazAqparat – Túrkistandyq kásipkerler «Sybaǵa» baǵdarlamasynyń kómegimen kásipterin dóńgeletip otyr, dep habarlaıdy QazAqparat ákimdikke silteme jasap.

Túrkistan oblysy Túlkibas aýdanyna qarasty Mashat aýylynyń turǵyny E.Tólepbekov memlekettik «Sybaǵa» baǵdarlamasynyń kómegimen jeke sharýashylyǵyn ashyp, óz isin dóńgeletip otyr.

Ol jeńildetilgen nesıe alyp, oǵan 75 bas iri qara malyn satyp alǵan. Kásipkerdiń aldyna qoıyp otyrǵan maqsaty – et baǵytyndaǵy mal sharýashylyǵyn damytyp, shetelderge ózi óndirgen ónimdi eksporttaý.

Aýdanda atalǵan baǵdarlamaǵanyń sharapatyn kórip otyrǵandar az emes. Máselen, byltyrdyń ózinde 10-nan astam sharýa qojalyǵy osyndaı jolmen mal basyn kóbeıtip, óńirimizdi ǵana emes, ózge oblystardy da etpen qamtyp keledi. Sharýashylyqtyń osy baǵytyna qoldaý bildirý maqsatynda aýdanda et óńdeıtin keshenmen, sút fermasy salynǵan. Aldaǵy ýaqytta mundaı óndiris oryndarynyń qatary artatyn bolady.

«Sybaǵa» baǵdarlamasy aıasynda «Aýyl sharýashylyǵyn qoldaý qory» AQ arqyly 70 mln teńgege deıin nesıe rásimdeýge bolady. Tek et baǵytyndaǵy sharýashylyqqa beriletin qarjyny 4 paıyzdyq ústememen 15 jylǵa deıingi merzimge alýǵa bolady.

Aıta keteıik, Túlkibas aýdanynda QR-nyń agroónerkásiptik keshenin damytýdyń 2017 – 2021 jyldarǵa arnalǵan memlekettik baǵdarlamasy aıasynda bıyl iri qara mal basy sanyn 265-ke jetkizý kerek bolsa, qazirgi tańda bul kórsetkish 299-ǵa jetip, jospar 112,8 paıyzǵa oryndalǵan.