Svetlana Jaqypova ulttyq kompanııa basshylarynyń tabysyna qatysty pikir bildirdi

<p>Eńbek jáne halyqty áleýmettik qorǵaý mınıstri Svetlana Jaqypova kvazımemlekettik kompanııa basshylarynyń aılyǵy men syıaqysyn eldegi kúnkóris deńgeıine baılaý týraly usynysqa pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Kvazımemlekettik sektordaǵy basshylar men menedjerlerdiń aılyǵy men syıaqysy týraly daýly pikir kóp. Qanshama túsindirý jumystary júrgizilse de, halyq olardyń qyrýar syıaqy alatynyn qabyldamaı otyr. Atalǵan basshylardyń aılyǵy men syıaqysyn eń tómengi kúnkóris deńgeıi, saladaǵy eń tómengi jalaqy sııaqty áleýmettik kórsetkishterge baılap retteý týraly usynysqa ne aıtasyz?», - dep surady jýrnalıst Úkimet otyrysynan keıin ótken baspasóz máslıhatynda.

Mınıstr Svetlana Jaqypovanyń aıtýynsha, ol basqaratyn vedomstvo kvazımemlettik sektordaǵy eńbekaqy máselesin retteýge quzyrly emes.

«Negizi meniń aıtarym, depýttar óz usynystaryn kvazımemlekettik sektorda jumys istep júrgen azamattarmen birlesip qarastyrý kerek. Birinshiden, Úkimettiń №1193 degen qaýlysy bar. Azamattyq qyzmetkerlerdiń jalaqysyn ǵana memleket retteıdi. Ózińiz túsinesiz ǵoı, ıaǵnı bul qaýly bilim salasynda, densaýlyq salasynda jáne áleýmettik saladaǵy qyzmetkerlerdiń jalaqysyn ǵana retteıdi. Al kvazımemlekettik sektorǵa mınıstrliktiń quzyreti joq», - dedi Svetlana Jaqypova.

Onyń paıymynsha bul máseleni naryq ózi retteýi kerek.

«Ekinshiden, siz aıtyp otyrǵandaı jaǵdaı, kvazımemlekettik sektordyń jalaqysyn retteý degen másele halyqaralyq deńgeıde de joq. Naryq qatynasy deımiz. Ondaǵy basshylardyń tabysyn kúnkóris deńgeıine nemese ortasha aılyqqa baılaý degen másele joq. Sondyqtan depýtattar mundaı usynysty atalǵan basshylarmen otyryp ózderi talqylaý kerek. Siz áleýmettik jeli qoldanýshylary usyndy dep otyrǵan bastamany depýtattar da kóterip júr. Ol usynysty memleket qabyldap, tıisti jumys isteý kerek dep otyrsańyz, onda kóreıik», - dedi mınıstr.