Svetlana Romanovskaıa: Tutynýshylar óz quqyǵyn bilmeıdi

ALMATY. QazAqparat - Sapasyz ónimderge shaǵymdanǵan qazaqstandyqtar sany 23,5 paıyzǵa artqan. Bul týraly Almatyda ótken baspasóz konferentsııasynda  «NOMAD Inshýrans» jáne «Ulttyq tutynýshylar lıgasy» RQB saqtandyrý kompanııalarynyń ókilderi málimdedi, dep habarlaıdy QazAqparat tilshisi. 

Mamandardyń aıtýynsha, 2017 jyldyń alǵashqy jarty jyldyǵynda  9713 shaǵym kelip tússe, jyl sońyna deıin bul kórsetkish 12696 -ǵa jetken.

 «Bizdiń kompanııa sapasyz ónimder men qyzmet kórsetýlerge baılanysty  tutynýshylar arasynda saýalnama júrgizgen bolatyn. 119 adamnan ǵana jaýap ala aldyq. Saýalnama nátıjesi boıynsha tutynýshylardyń 61 %-y keleńsizdikterge tap bolyp, olardyń 45 %-ynyń máselesi sheshimin tapqan. 12 % óz quqyǵyn qorǵaýǵa tyrysqanymen, onysy sátsiz aıaqtalǵan»,-dedi «NOMAD Inshýrans» basqarmasynyń ókili Dáýren Imanjolov.

Onyń málimetinshe, kásibı jaýapkershilikti, qoımany, demalysty, perzenthanadaǵy qaýipsizdik úshin saqtandyrý túri kóbeıgen. 

«Eger qandaı da bir shıelenis týyndasa, Ulttyq tutynýshylar Lıgasyna júginý kerek. Jyl basynan beri 46 shaǵymdy qarastyrdyq, onyń 21-i talap tártibinde, 12-i medıatsııalyq tártipte qaraldy, 13-i sotqa jiberildi. Adamdardyń kóp qatelesetin tusy - ónimdi sýretke, beınejazbaǵa túsirýge bolatynyn bile bermeıdi. Tutynýshylar dúkenderdegi tyıym salynǵan habarlamaǵa qaramastan, taýardy sýretke, beınejazbaǵa túsirýge tolyq quqyly ekenin aıtqym keledi», - deıdi  «Ulttyq tutynýshylar lıgasy» RQB tóraıymy Svetlana Romanovskaıa.

Sondaı-aq, baspasóz konferetsııasyn uıymdastyrýshylar tutynýshylar lıgasyna múshelik kartasyn ala alatynyn qalalyqtardyń qaperine saldy. Sol arqyly mamandardan tutynýshylar quqyǵy jaıyndaǵy málimetterge qanyǵa alady. Atalǵan uıymǵa múshelik tutynýshylyq quqyqty qorǵaýmen qatar moraldyq zııannyń óteýin talap etýge kúsh salady.

 «Qazir ata-analarǵa balabaqshalarda taǵamnyń, oıynshyqtardyń sapasyn tekserýge bolmaıdy. 50 orynnan aspaıtyn meıramhanalardaǵy tamaq merzimi men sapasyn  arnaıy organ qyzmetkerlerine tekserýge  tyıym salynǵan. Biz ózimizdiń saıtymyzdy iske qostyq. Ol jerde osyǵan uqsas jaǵdaılarda óz quqyǵyn taptatpaý úshin qandaı qadamdarǵa barý kerektigi aıtylady. Sondaı-aq Lıga músheleri azdaǵan somaǵa zańgerlik qyzmetti paıdalana alady»,-dedi Svetlana Romanovskaıa.

Onyń aıtýynsha, elimizdiń iri saýda oryndarynda  mamandarmen tekserilgen  ónimder arnaıy sórelerge qoıylady. Olarǵa «Bezýprechno» degen belgi japsyrylyp, ol baǵasyna sapasy saı ekendigin bildiretin bolady.