Suıytylǵan munaı gazyn bólshek saýdada ótkizýde 180 sýbektige tergep-tekserýler taǵaıyndaldy

NUR-SULTAN. QazAqparat – 6 kóterme suıytylǵan gaz satýshysyna qatysty tergep-tekserýler taǵaıyndaldy. Bul týraly Úkimet otyrysynda Básekelestikti qorǵaý jáne damytý agenttiginiń tóraǵasy Serik Jumanǵarın aıtty, dep habarlaıdy QazAqparat tilshisi.

«Bas prokýratýramen birlesip 6 kóterme suıytylǵan gaz satýshysyna («QazMunaıGaz» AQ, «Petrosun» JShS, «SNPS-Aqtóbemunaıgaz» AQ, «QazGerMunaı BK» JShS, «Qazaqoıl Aqtóbe» JShS jáne «QazGÓZ» JShS - monopolııalyq joǵary baǵalardy belgileý bóliginde ústem jaǵdaıdy teris paıdalaný belgileri boıynsha) jáne suıytylǵan munaı gazyn bólshek saýdada ótkizý naryǵynyń 180 sýbektisine qatysty tergep-tekserýler taǵaıyndaldy. Baǵanyń ósýiniń negizgi sebebi elektrondyq saýda alańyndaǵy baǵa mehanızminiń jetilmegendigi ekenin tergep-tekserýdiń aldyn ala nátıjeleri kórsetti», - dedi S. Jumanǵarın.

Onyń aıtýynsha, osyǵan baılanysty, ótken jyly «Gaz jáne gazben jabdyqtaý týraly» zańnamaǵa ózgerister engizildi jáne Memleket basshysy 2021 jylǵy 30 jeltoqsanda «Qazaqstan Respýblıkasynyń keıbir zańnamalyq aktilerine saýda qyzmeti, bırjalyq saýdany damytý jáne derbes derekterdi qorǵaý máseleleri boıynsha ózgerister men tolyqtyrýlar engizý týraly» Zańǵa qol qoıdy jáne osy jyldyń ózinde suıytylǵan munaı gazyn ótkizý taýar bırjalaryna aýysady jáne turaqty baqylaýda bolady.

Budan buryn habarlanǵandaı, kún saıyn suıytylǵan munaı gazynyń ótkizý baǵalaryna monıtorıng júrgiziledi.