Suıytylǵan gaz óndirýshiler shyǵynǵa tap bolýda - depýtat

ASTANA. QazAqparat - 2019 jyldan bastap suıytylǵan gazdy satý boıynsha elektrondyq saýda alańdary jumys isteýi múmkin. Bul týraly Parlament Májilisinde «Gaz jáne gazben jabdyqtaý týraly» QR Zańyna ózgerister men tolyqtyrýlar engizý týraly» zań jobasynyń tanystyrylymy barysynda málim boldy, dep habarlaıdy QazAqparat.

«Bul jaǵdaılarda tsıfrlandyrý men bıznes úshin ákimshilik shekteýlerdi tómendetý boıynsha júrgizilip jatqan saıasattyń aıasynda, elektrondyq saýda alańdary (ESA) kóterme saýdany júrgizý arqyly ishki naryqta suıytylǵan gazǵa kóterme baǵany belgileýdi lıberalızatsııalaý qajet. Biz daıarlaǵan túzetýler atalǵan tetikti kezeń-kezeńmen 2019 jyldyń 1 qańtarynan engizýdi qarastyrady. ESA arqyly satylatyn barlyq gazǵa QR Energetıka mınıstrligi bekitetin shekti kóterme baǵa qoldanylmaıdy», - dedi Parlament Májilisiniń depýtaty Baqtyqoja Іzmuhambetov.

Birinshi kezeńde ishki naryqqa berý josparynyń aıasynda jiberiletin suıytylǵan gazdyń 20 paıyzyn ESA arqyly ótkizý, al keıinnen birtindep atalǵan úlesti arttyrý usynyldy. Bastapqyda gaz jelisi uıymdary, sodan keıin ónerkásiptik kásiporyndar, gaz quıý stansalary men gaz toltyrý beketteriniń ıeleri de Elektrondy saýda alańdarynda gaz satyp alýshylar bolýy múmkin.

«Bul zań jobasyna bastamashy bolýǵa ishki naryqtaǵy suıytylǵan munaı gazyna qatysty qalyptasqan jaǵdaı ıtermeledi. Osyndaı gaz bizde negizinen kólikte (avtogaz), sondaı-aq turmystyq ballondar jáne taýarlyq gazben qamtylmaǵan óńirler turǵyndary tarapynan toptastyrylǵan qurylǵylar arqyly tutynylady. Elde QQS-ty esepke ala otyryp, tonnasyna 43 345 teńge somasynda suıytylǵan gazǵa shekti kóterme baǵa belgilengen. Bul óz kezeginde kórshiles elderdiń shekaralas óńirlerindegi kóterme baǵamen salystyrǵanda eleýli baǵa aıyrmashylyǵyn qalyptastyryp otyr», - dedi Baqtyqoja Іzmuhambetov zań jobasy boıynsha baıandamasynda.

Osyndaı tómendetilgen kóterme baǵa zańsyz eksportty yntalandyratyn kórinedi.

«Sonymen birge, Qazaqstanda suıytylǵan gazǵa bólshek saýda baǵasy kóterme qunyna qaraǵanda, aıtarlyqtaı joǵary jáne kórshiles elderdegi bólshek baǵadan shamaly ǵana arzandaý. Nátıjesinde, ishki naryqqa gazdy jetkizý arqyly bizdiń zaýyttar shyǵynǵa tap bolýda», - dep túsindirdi depýtat.

Onyń paıymynsha, suıytylǵan gazǵa memleketpen retteletin baǵa energetıkalyq ónimder naryǵynda baǵalyq aıyrmashylyqtardy kúsheıtedi. Osynyń saldarynan suranystyń jasandy túrde ósýin týdyrady. Suıytylǵan munaı gazyna baǵany retteý boıynsha saıasat túpkilikti tutynýshy úshin tómen baǵa túrinde tıisti áleýmettik nátıjeni qurý boıynsha eń basty maqsatty sheshpeı otyr.

«Túpkilikti tutynýshy suıytylǵan gazǵa kórshiles elderdegi bólshek qunǵa shamalas baǵany tólep keledi. Al memleket retteletin baǵany qalyptastyrý saıasatynyń áleýmettik nátıjesin halyq emes, deldaldar kórip otyr», - dedi depýtat.

Onyń aıtýynsha, sońǵy tórt jylda suıytylǵan gazǵa degen suranys eki esege artqan.