Suıytylǵan gaz baǵasyn turaqty ustaý merzimi keler jyldyń maýsymyna deıin uzartylmaq

ASTANA. QazAqparat – «QR aýmaǵynda avtogaz quıý stantsııalarynda avtokólikke janarmaı quıý úshin suıytylǵan munaı gazyn bólshek saýdada ótkizýge ýaqytsha memlekettik baǵa retteýdi engizý týraly» Básekelestikti qorǵaý jáne damytý agenttigi tóraǵasynyń buıryǵyna ózgeris engiziledi. Qujat talqylaý úshin «Ashyq» NQA portalynda jarııalandy, dep habarlaıdy QazAqparat tilshisi.

Aıta keteıik, buǵan deıingi buıryqqa sáıkes, suıytylǵan munaı gazynyń baǵasyn turaqty ustap turý merzimi 2023 jyldyń 1 qantarynda aıaqtalady. Sondyqtan Básekelestikti qorǵaý jáne damytý agenttigi ony uzartýdy usynyp otyr.

«Osy buıryq alǵashqy resmı jarııalanǵan kúninen bastap qoldanysqa engiziledi jáne 2023 jylǵy 30 maýsymǵa deıin qoldanylady. Suıytylǵan munaı gaz naryǵynyń bólshek segmentinde erkin baǵa belgileý jaǵdaıynda baǵanyń kúrt ósý jáne qoǵamdaǵy áleýmettik shıelenistiń paıda bolý qaýpi bar.Osyǵan baılanysty, avtogaz quıý stantsııalarynan Suıytylǵan munaı gazyn bólshek saýdada ótkizýdiń baǵasyn retteýdi 2023 jyldyń 30 maýsymyna deıin uzartý usynylady.

Memleket basshysynyń 2022 jylǵy 5 qańtardaǵy tapsyrmasy boıynsha agenttik avtogaz quıý stantsııalarynan suıytylǵan munaı gazyn bólshek saýdada ótkizýge shekti baǵalar engizip, ýaqytsha memlekettik baǵalyq retteý engizdi. Óńirge baılanysty lıtrine - 70 teńgege deıin», - delingen ashyq talqyǵa shyǵarylǵan qujatta.

Eske salaıyq, buǵan deıin Parlament Májilisinde suıytylǵan gaz baǵasyn retteıtin qujat talqylanatynyn habarlap edik.