Suıytylǵan gaz baǵasy óspeıdi - Energetıka mınıstrligi

NUR-SULTAN. QazAqparat - Qazaqstanda suıytylǵan munaı gazy bólshek saýda baǵalary kóterilmeıdi, dep habarlaıdy QazAqparat Energetıka mınıstrligine silteme jasap.

1 shildede QR Energetıka mınıstrliginiń suıytylǵan munaı gazynyń shekti kóterme saýda baǵasyn 1 tonnasyna 33 600 teńge deńgeıinde bekitý týraly buıryǵy kúshine enedi. Bul 1 lıtrge shaqqanda 19,7 teńgeni quraıdy, jyl basynan bastap kóterme saýda baǵasy – 1 tonna úshin 28 000 teńgeni (16 tg./ lıtr) qurady.

«Suıytylǵan gazǵa kóterme saýda baǵalaryn 20% - ǵa arttyrý (3,7 tg./ l.) birinshi kezekte zaýyttardyń suıytylǵan gaz óndirisin qoldaýǵa baǵyttalǵan. Bul shara suıytylǵan gazdy óndirýshiler men ótkizýshiler arasynda kiristerdi ishinara ádil bólýdi qamtamasyz etýge jáne zaýyttardy suıytylǵan gaz óndirýge yntalandyrýǵa múmkindik beredi, óıtkeni aǵymdaǵy kóterme saýda baǵasy 1 tonna úshin 28 000 teńge bolǵan kezde paıdanyń negizgi úlesi suıytylǵan gazdy bólshek saýdada ótkizýmen aınalysatyn naryq sýbektilerinde qalady, al óndirýshi zaýyttar shyǵynmen jumys isteıdi. Bul rette qazirgi ýaqytta QR Básekelestikti qorǵaý jáne damytý agenttigi shekti bólshek saýda baǵalaryn memlekettik retteý merzimderin uzartý boıynsha jumystardy júrgizip jatqanyn, oǵan sáıkes sońǵy tutynýshylar úshin suıytylǵan munaı gazy bólshek saýda baǵalary kóterilmeıdi jáne burynǵy deńgeıde qalatynyn habarlaımyz», - delingen mınıstrlik habarlamasynda.

Sýret: Energetıka mınıstrliginen