Suıytylǵan gaz aınalymyn retteý baǵytynda zańnamaǵa engiziletin ózgerister talqylanady - Májilis

ASTANA. QazAqparat – Búgin Májilis spıkeri Erlan Qoshanovtyń tóraǵalyǵymen Palata Bıýrosy ótip, onda aldaǵy jalpy otyrystyń kún tártibi naqtylandy. Bul týraly QazAqparat Májilistiń baspasóz qyzmetine silteme jasap habarlaıdy.

Jalpy otyrysta Májilis depýtattarynyń bastamasymen ázirlengen «Qazaqstan Respýblıkasynyń keıbir zańnamalyq aktilerine suıytylǵan gaz aınalymyn retteý protsesteriniń reınjınırıngi máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaý usynylady.

Atalǵan zań jobasy naryq jaǵdaılaryn eskere otyryp, suıytylǵan gazǵa baǵa belgileý jáne ony bólý protsesterin júıeli retteýge, kóleńkeli eksportty bolǵyzbaýǵa, óńirlerde suıytylǵan munaı gazynyń zańsyz aǵynyna jol bermeýge baǵyttalǵan.

Sondaı-aq, kún tártibiniń jobasynda ratıfıkatsııalanatyn zań jobalary bar. Olar: úshinshi eldermen ózara saýdadaǵy tehnıkalyq kedergilerdi joıý tártibi men sharttary týraly kelisim jáne Ázerbaıjanmen ósimdikter karantıni jáne olardy qorǵaý salasyndaǵy yntymaqtastyq týraly kelisim.

Sonymen qatar, Májilis komıtetteri birqatar jańa zań jobasyn jumysqa alady. Atap aıtqanda, áleýmettik jáne ákimshilik quqyq buzýshylyq týraly kodekster jobasy, konstıtýtsııalyq zańdarǵa ózgerister engizý, áleýmettik qamsyzdandyrý máseleleri boıynsha túzetýler engizý men jylý energetıkasy, jergilikti ózin-ózi basqarý, jol júrisin uıymdastyrý máseleleri boıynsha ózgerister men tolyqtyrýlar engizý týraly zań jobalary bar.

Jumysqa alynatyn zań jobalarynyń qatarynda kedendik tranzıttiń kedendik rásimine sáıkes taýarlardy tasymaldaý (tasý) kezinde kedendik bajdardy, salyqtardy, arnaıy, dempıngke qarsy, ótemaqy bajdaryn tóleý jónindegi mindetti oryndaýdy qamtamasyz etýdi qoldanýdyń erekshelikteri týraly kelisimdi ratıfıkatsııalaý týraly zań jobasy bar.

Sýretti túsirgen J. Jumabekov