Súıegim Otanymda jerlense, shirkin-aı – Qytaıdaǵy qazaq ájeıdiń armany
Qytaıda turatyn Parıman Shaımardanqyzy qazaqstandyqtardy qazaqy salt-dástúrmen shashý shashyp qarsy aldy. Kózine jas alǵan aqjaýlyqty ájeı eń aldymen: «El-jurt aman ba?» — dep surady. Jasy jetpisten asqan Parıman Shaımardanqyzy Úrimshi óńirinde týyp-ósken.
«Joldasymnan 42 jasymda qaldym. Jalǵyz ózim úsh qyzymdy ósirip jetkizdim. Qazir bári balaly-shaǵaly. Ortanshy qyzym men kúıeý balam qolymda. Kásibimiz — dıhanshylyq. Sońǵy on jylda osy kásipke týrızmdi qostyq. Ózderiń sııaqty shet elden jáne ishki Qytaıdan kelgen týrısterdi kútemiz», — deıdi ol.
Aıtýynsha, týrısterge ulttyq taǵamdardy usynady.
«Kelgen qonaqtarǵa dastarhan jaıyp, ulttyq taǵamdarymyzdy usynamyz. Atap aıtar bolsam, qazy-qarta, qymyz-shubat, qurt-irimshik, sary maı, baýyrsaq jáne taǵy basqalary. Bárin qyzym daıyndaıdy men endi arasynda shamam kelgenshe kómektesemin», — deıdi ájeı.
Parıman Shaımardanqyzy Qazaqstanǵa degen saǵynyshyn da jasyra almady. Osydan 7-8 jyl buryn ómirinde alǵash ret Jetisý óńirindegi týysqandaryna kelgen eken.
«Qazaqstan — meni ómirge ákelgen áke-sheshemniń kindik qany tamǵan jer. Otanym! Osydan 7-8 jyl buryn Taldyqorǵanda turatyn týysqandarǵa qonaqqa bardym. Ushaqtan túse salysymen qarashańyraqqa ıilip sálem berdim. Bir aı boldym. Bári ana tilimde sóıleıdi. Sondaı keremet áser aldym. Úıge qaıtyp kelgenimde biraz ýaqytqa deıin jan-dúnıem alaı-dúleı boldy. Ózime qymbat nársem qalyp qalǵandaı sezimde boldym», — dep kózine jas aldy ájeı.
Parıman Shaımardanqyzynyń armany — nemereleriniń Qazaqstanda bilim alyp, óz elinde er jetkeni.
«Qaı ýaqytta dám tartady, sol kezde elge kóshemiz. Bala-shaǵam óz elinde bilim alsa, ana tilinde sóılese deımin. Bul jaqta qazaq mektebi joq. Qytaı tilinde oqıdy. Nemerelerime barynsha qazaq tilinde óleń úıretip, jatar kezde ertegi oqyp berem, shyraǵym. Súıegim Otanymda jerlense, shirkin-aı dep armandaımyn», — deıdi ol.