Sútti tereń óńdeý jáne 4-5-shi synypty bıdaı baǵasy: Serik Jumanǵarın Pavlodar oblysy sharýalarymen kezdesti

<p>ASTANA. KAZINFORM - Pavlodar oblysy &ndash; elimizdegi egistik alqaptarynyń kólemi boıynsha 4 orynda.&nbsp;Jalpy egistik kólemi 1,6 mln gektar alqaptyń 928,5 myń gektaryna dándi jáne burshaqty, 374,3 myń gektaryna &ndash; maıly, 281,2 myń gektaryna &ndash; mal azyqtyq daqyldar, qalǵanyna kókónis egildi.</p>

QR Úkimeti baspasóz qyzmetiniń habarlaýynsha, búginde oblysta kartop tolyq jınalyp, dándi daqyldar men kókónisterdiń 99%-y jınaldy, maıly daqyldar jınaý jumystary bastaldy.

Premer-Mınıstrdiń orynbasary Serik Jumanǵarın Pavlodar oblysyna jasaǵan jumys sapary aıasynda «Agro-Trade PV» JShS-niń syıymdylyǵy 10 myń tonna kókónis saqtaý qoımasy men 1,2 myń mal basyna arnalǵan taýarly-sút fermasyna bardy. Agrarlyq nesıe korporatsııasynyń qoldaýymen 2022 jyly salynǵan taýarly-sút fermasy jylyna 4 mln lıtr sút óndiredi. Odan soń shıkizat qaıta óńdeý úshin jergilikti sút óńdeý zaýytyna jiberiledi.

Kásiporyn mal azyǵy jáne kartop ósirýmen aınalysady. Vıtse-premer kókónis qoımasy bazasynda óńirdegi iri fermerlermen kezdesti. Sharýalardy 4-5-shi synypty astyqty forvardtyq satyp alý baǵasy qyzyqtyrdy.

«Biz bıdaı ósiremiz, bıyl eginniń basym bóligi – 4-5-shi synypty. Azyq-túlik korporatsııasy 3-shi synypty bıdaı baǵasyn jarııalady. Qazir 4-5-shi synyptar baǵasynda retsizdik bar, tonnasyn 30-40 myń teńgeden usynýda. Azyq-túlik korporatsııasynyń baǵasyn bilgimiz keledi», — dep qyzyǵýshylyq tanytty «BıK» ShQ dırektory.

Serik Jumanǵarın sharýalarmen áńgimelesý kezinde qazirdiń ózinde satyp alý baǵasy anyqtalǵanyn, Azyq-túlik korporatsııasy ony jaqyn kúnderi jarııalaıtynyn jetkizdi. Atap aıtqanda, dáninde 21-22% aqýyzy bar 4-shi synyp úshin tonnasyna 75 myń teńge deńgeıinde baǵa qalyptastyryldy.

Sondaı-aq kezdesýde vıtse-premer sharýalarǵa bıyl 3 mln tonnaǵa jýyq astyq jóneltý josparlanǵan Qytaıǵa astyq eksporttaýdyń úlken áleýeti týraly málimdedi. Sonymen qatar ol mal sharýashylyǵyn damytýdy qoldaýdyń aldaǵy memlekettik baǵdarlamasy týraly toqtalyp, bul baǵytta kásipkerlikti damytýǵa kóńil bólýge shaqyrdy.

«Biz kelesi jyly mal sharýashylyǵyn memlekettik qoldaýdyń aýqymdy baǵdarlamasyn iske qosýdy, birinshi kezekte, aýstralııalyq ádispen júzege asyrylatyn jobalardy júzege asyrýdy josparlap otyrmyz. Bul rette sýarmaly egin sharýashylyǵyn damytýǵa da qoldaý kórsetemiz. Sonymen qatar Ertis ózeni men Q. Sátbaev atyndaǵy kanaldyń áleýeti Pavlodar oblysynda 200 myń gektarǵa jýyq jerdi sýarmaly alqapqa aınaldyrý jobalaryn iske asyrýǵa múmkindik beredi. Otandyq jańbyrlatyp sýaratyn qondyrǵylar óndirisiniń bolýyn jáne mal sharýashylyǵyn damytý jónindegi bolashaq jobalardy eskere otyryp, biz óńirge memleket jeńildetilgen nesıe berý arqyly qoldaý kórsetetin sýarmaly jerlerdi damytý jónindegi baǵdarlamany ázirleýdi usyndyq», — dep atap ótti Serik Jumanǵarın.

Sondaı-aq vıtse-premer Lactalis Kazakhstan (FýdMaster) kompanııalar tobyna kiretin «Sút» AQ sút óńdeý zaýytynda boldy. Zaýyt 220 adamdy jumyspen qamtamasyz etip, táýligine óńdeýge 200 tonna sút qabyldap otyr. Munda sút, aıran, maı jáne basqa da ónimder shyǵarylady. Shıkizat «Kırov» JShS-niń jeke taýarly-sút fermasynan, oblystaǵy basqa da iri taýarly-sút fermalarynan alynady.

«Sút» AQ basqarma tóraǵasy Svetlana Taran buǵan deıin kásiporyn shıkizattyń shamamen 70%-yn jergilikti óndirýshilerden, al, qalǵan kólem Qazaqstannyń basqa óńirlerinen satyp alynǵanyn aıtty. Qazir jańa taýarly-sút fermalarynyń iske qosylýyna oraı jergilikti iri fermalar 96% sútpen qamtamasyz etip otyr. Sonymen qatar zaýyt óndiris qýatyn kezeń-kezeńimen keńeıtýde – bıylǵy úshinshi toqsanda ýltrapasterlengen sút óndirý boıynsha qosymsha jeli iske qosyldy.

Sonymen birge vıtse-premer Qazaqstandaǵy tanymal premıým-klasty kespe óndiretin «KEMMI GROUP» JShS qyzmetimen tanysty. Kásiporyn jylyna 150-den astam ónim túrin, shamamen 10 myń tonna makaron óndiredi. Іshki naryqty qamtamasyz etýmen qatar, kásiporyn ónimderin Qyrǵyzstan, Reseı, Belarýs, Ózbekstan, Mońǵolııa, Germanııa elderine eksporttaıdy.