Sút zaýyttarynyń júktelýi 65 paıyzdy qurap tur - AShM

NUR-SULTAN. QazAqparat – Jyl saıyn 25 ónerkásiptik taýarlyq sút fermasy paıdalanýǵa beriledi. Bul týraly Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

«2020 jyly zamanaýı tsıfrlyq tehnologııalar qoldanylatyn 25 ónerkásiptik taýarlyq sút fermalary, 3 et kombınaty, 8 qus fabrıkasy salynady. Sonymen birge, 2000 gektarǵa baq otyrǵyzý josparlanýda, Jambyl oblysynda qant zaýytynyń qurylysy bastalyp ketti. Bul jobalardyń barlyǵy boıynsha ótken jyly daıyndyq jumystary júrgizildi, naqty ınvestorlar aıqyndalyp, qazirgi ýaqytta qarjylandyrý máselesi sheshilýde», - dep toqtaldy S. Omarov Parlament Májilisindegi Úkimet saǵatynda.

Onyń sózine qaraǵanda, úsh jyl ishinde irimshik pen súzbe óndirisi 16,2 paıyzǵa ulǵaıyp, 29,5 myń tonnany qurady. Qamtamasyz etilý 54,8 paıyzdan 57 paıyzǵa deıin ósti.

«Bul rette, elimizde shamamen 5,8 mln tonna sút óndirilgenimen, sút zaýyttarynyń júktelýi qazir shamamen 65 paıyzdy quraıdy. Osyǵan baılanysty, jyl saıyn 25 ónerkásiptik taýarlyq sút fermasyn engizý arqyly sút óndirisin qarqyndy formatqa aýystyrý usynylady. Bul jyl saıyn qosymsha 120 myń tonnaǵa deıin sút óndirýge jáne 1250 jumys ornyn qurýǵa múmkindik beredi. Osy úshin qarjylandyrýdyń jeńildetilgen sharttary paıdalanylatyn bolady», - dedi vedomstvo basshysy.

Bul sharalardy iske asyrý esebinen 5 jyl ishinde sút zaýyttarynyń tolyq júktelýin qamtamasyz etý josparlanýda.