«Sýsamyrǵa shaldyqqandar sabylmaıdy» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 27 qańtar, sársenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

«Egemen Qazaqstan» gazetiniń jazýynsha, Qaraǵandy oblysynda aıaq as­ty­nan 20 jastaǵy stýdent Ivan Ma­karov joǵalyp ketti. Ázirge onyń qaıda ekenin tiri jan bilmeıdi. Bar bolǵany ol úıden keterinde tildeı hat qaldyrypty. Onda «eshkimge zııanymdy tıgizbeı, osylaı ket­kenim durys, barlyq problema she­shilgennen keıin ózim kelem» degen mazmundaǵy sózder jazylǵan... Úı­den keterinde ol ózimen birge noýtbýk, telefon, Altel 4G jyljy­maly ınternetin ala ketken...

«Baqsaq - baqa eken demekshi», stýdenttiń aldy-artyna qaramaı, úıden nege bezgeni endi belgili bol­dy. Sóıtse, Saran qalasyndaǵy gýmanıtarlyq-tehnıkalyq kol­ledj­diń stýdenti biraz ýaqyttan be­ri ınternette kazıno oınaıdy eken. Alaıda, úı-ishi onyń mundaı qumar oıynǵa basy baılanǵanyn bilmepti. Oqý ozaty, tártibi úlgili, sportpen shuǵyldanatyn odan mun­daı «óner» shyǵady dep áste kút­pese kerek.

Aǵasy Mıhaıldyń aıtýynsha, Ivan ınternet oıynhanasynda iri kólemde aqshaǵa utylǵanǵa uq­saıdy. Ol aqshany bireýlerden qaryzǵa alýy múmkin nemese oıyndy qaryzǵa oınaǵan. Bir belgilisi, búginde Ivandy bireýler izdep júr já­ne olar qoldaryna tússe ony aıaıyn dep júrgen joq... Taıaýda Mıhaıl Saran qala­syndaǵy ishki ister bólimine ba­ryp, polı­tsııaǵa inisi­niń jo­ǵalýyna baı­la­nys­ty aryz túsir­di. Bul týraly «Kazınodan qashqan qashqyn» atty materıalda berilgen.

Bas basylymda «Tyń jobanyń artyqshylyǵy kóp» degen maqala kópshilik nazaryna usynylyp otyr. Qyzyljar óńirinde jolaýshylar tasymaldaıtyn avtobýstar «Galileo» dep atalatyn spýtnıktik baqylaý quraldary arqyly jumys isteı bastady. Tıimdiligi zor tyń jobany astanalyq «KazInterSoft» JShS ornatty.

Endi budan bylaı qoǵamdyq kólikterdiń qozǵalysy naqty ýaqyt rejimin qamtamasyz etetin dıspetcherlik qyzmet arqyly basqarylyp, baqylanady. Aımaq basshysy Erik Sultanov «BusReport» dıspetcherlik jú­ıesiniń jumysymen tanysyp, aıaldamalardyń birinde or­natylǵan «aqyldy tablony» tamashalady.

Seriktestik dırektorynyń orynbasary Serik Serǵazy «Infobus. kz» saıtynyń erek­sheligin baıandap, 300 avtobýs­ta «Galileo» dep atalatyn spýt­­nıktik baqylaý qural­dary­nyń ornatylǵanyn málim­de­di. Munyń ózi kólik ınfra­qu­rylymyn damytýǵa, qozǵalys kestesiniń qatań saqtalýyna, jolaýshylar tasymalyn jedeldetýge birden-bir sep. Kún saıyn jelige shyǵatyn avto­býstardyń sany jaıly naqty aqparat usynylady. Qoǵamdyq kólikterdiń baǵyt-baǵdaryn, júrý kestesin ǵalamtor arqyly da baqylaýǵa bolady. Jobanyń taǵy bir ereksheligi sol, «Infobus.kz» saıtynyń baǵdarlamasyn uıaly telefonǵa da júkteı ala­tynynda. Búgingi tańda 9 myń turǵyn baǵdarlamanyń kóme­gine júgingen.

Oblystyq avtokólik odaǵy qaýymdastyǵynyń tóraıymy Galına Semenova jolaýshy ta­sy­maldaýshylar bul jobany biraýyzdan qoldap, serik­testikpen kelisimshartqa otyr­ǵanyn jetkizdi.

Erik Hamzauly Sport saraıy aıaldamasynda ornatylǵan elektrondy tablonyń jumysymen tanysty. Petropavl qalasynda mundaı qondyrǵylardyń sany ázirge úsheý. Jaryqdıodty ek­ran arqyly avtobýstyń qoz­­ǵalys kestesi men qansha ýaqyttan keıin keletinin, aýa­nyń temperatýrasyn da bilýge bolady.

***

«Almaty oblysynyń ortalyǵy Taldyqorǵan qalasyndaǵy «NýrAvıtseným» medıtsına ortalyǵynda respýblıka boıynsha alǵashqylardyń biri bolyp qant dıabeti ortalyǵy ashyldy», - dep jazady «Aıqyn» gazeti búgingi sanyndaǵy «Sýsamyrǵa shaldyqqandar sabylmaıdy» atty maqalada. Elbasynyń 5 ınstıtýttyq reformasyn júzege asyrý jónindegi «Ult jospary - «100 naqty qadamnyń» 81-qadamynda kórsetilgen «jekemenshik medıtsınany damytý, medıtsınalyq mekemelerge korporatıvtik basqarýdy engizýdi» iske asyrý maqsatynda júzege asyrylǵan qadam turǵyndardyń kóńilinen shyqty. Sonymen birge buǵan bıyl elimizde oryndala bastaǵan «Densaýlyq» memlekettik baǵdarlamasynyń da ózindik septigi tıgeni anyq. Sýsamyrǵa shaldyqqan naýqastar ortalyq arqyly tegin emdelip, tegin dári-dármekpen qamtamasyz etiletin bolady.

Jańa emdeý ornynyń ashy­lýyna arnalǵan saltanatqa arnaıy kelgen Almaty oblysy ákiminiń orynbasary Bahtııar Ónerbaev:
- Elbasymyz qazirgi jahandyq ekonomıkalyq daǵdarysqa qara­mas­tan elimizdiń damýyn toqtatpaı, memleketimizdiń 2050 jylǵa deıingi strategııasynda kózdelgen meje­ler­ge jetý jolynda barlyq qajetti jaǵdaıdy jasaýda. Memleketimizdiń basty baılyǵy - halqymyzdyń den­saýlyǵyna kóńil bólinýde. Or­ta­lyqtyń ashylýy - memlekettik-jekemenshiktik áriptestikti ny­ǵaı­tý týraly tapsyrmany oryn­daý­dyń jarqyn kórinisi jáne S.Asfen­dııarov atyndaǵy Qazaq ulttyq medıtsınalyq ýnıversıteti men Almaty oblysynyń ákimdigi ara­syndaǵy yntymaqtastyq jónindegi memorandýmnyń jemisi.

Osy basylymda «Arab ınvestorlary Báıdibekti gúldendirmek» atty maqala jarııalandy. Birikken Arab Ámirliginen kelgen kásipker Ál-Baıdanı Mohammed Saleh Hasan Báıdibek aýdany Shaıan eldi mekenin kórkeıtý jumysyna 1 mln 700 myń dollar ınvestıtsııa salmaq. Halyqtyń salaýatty ómir saltyn qalyptastyrýdy nıet etken shetel kásipkeri jergilikti ákimdikpen kelisimge keldi.

Báıdibekke jasaǵan saparynda aýdan ákimi B.Kósherbaı men Ál-Baıdanı Mohammed Saleh Hasan Shaıan aýylyndaǵy sport jáne mádenı demalys nysandarynyń qurylysymen tanysyp, memoran­dým negizinde birqatar ınvestı­tsııa­­lyq jobalardy júzege asyrýǵa ýaǵdalasty. Qos taraptyń kelisimi aıasynda aýdandaǵy ortalyq saıabaq pen ortalyq stadıondy qaıta qurý, voleıbol, basketbol, gımnastıka jáne shaǵyn fýtbolǵa arnalǵan oıyn alańdaryn ornatý jáne jabyq basseın qurylysy jobalaryn iske asyrý kózdelýde.

Arab ınvestory qarjylan­dyrǵan Aqbastaý aýyldyq okrý­gin­degi qus ósirý ortalyǵyna bú­gin­gi kúnge deıin 3 mlrd 500 mln teńge shetel ınvestıtsııasy tarty­lyp, onda qazirgi tańda 120 adam jumyspen qamtylǵan. 2016-2017 jyldary jobanyń úshinshi fazasy júzege asyrylyp, taǵy da 7 mlrd teńge shetel ınvestıtsııasyn tartý josparlanýda. Aýdan ákimdigi men qus ósirý ortalyǵynyń basshyly­ǵy arasynda jasalǵan kelisim bo­ıynsha jobany júzege asyrý nátı­jesinde, jańadan ashylatyn 400-ge jýyq jumys oryndarynyń 80 paıyzyna aýdan turǵyndary ornalasatyn bolady. Sonymen qatar qosymsha kiris kózderin qalyptastyrý úshin atalǵan qus ortalyǵy aýdandyq memlekettik kirister basqarmasyna salyq tóleýshi retinde tirkeldi.

***

Tanymal «Doshırak» brendimen Ońtústik Qazaqstan oblysynda kespe ónimderi shyǵarylady, dep jazady «Kazahstanskaıa pravda» gazeti búgingi sanyndaǵy «Shymkentskıı retsept «bystroı» lapshı» atty materıalynda. Kásiporyndy qurý týraly mámile OQO ákimi B. Atamqulov pen Reseıdegi «Doshırak Koıa» koreılik kompanııasynyń bas dırektory K. Encheldiń kezdesýi barysynda kelisildi.