Sýretterim óskeleń urpaqqa rýhanı tárbıe berse deımin — palýandardy beıneleıtin Erkin Qaıshybek
QR Sýretshiler odaǵynyń múshesi Erkin Qaıshybek alyp kúsh ıeleri bolǵan Qajymuqan Muńaıtpasuly, Imanjúsip Qutpanuly, Balýan Sholaqtan bólek, Olımpıada chempıondary Jaqsylyq Úshkempirov, Shámil Serikov, KSRO, álem, Eýropa chempıony Dáýlet Turlyhanov, ony tárbıelep ósirgen ákesi Bolat Turlyhanovtyń, basqa da kúres sheberleriniń beınelerin somdap, sýretterin salǵan. Sýretshiniń týyndylary joǵaryda atalǵan esimderdiń ónegeli ómirin óskeleń urpaqqa nasıhattaýǵa arnalǵan.
Oqyrmanǵa túsinikti bolý úshin Erkin Qaıshybektiń kim ekenin aıta keteıik.
Erkin Bazarǵalıuly Qaıshybek — 1961 jyly 28 sáýirde Almaty oblysy Raıymbek aýdanynyń Qaınar aýylynda ómirge kelgen. 1982 jyly Abaı atyndaǵy QazPI-diń kórkemsýret-grafıka fakýltetin bitirgen. Uzaq jyldar atalmysh ınstıtýtta aǵa oqytýshy bolyp eńbek etti. Abaı atyndaǵy QazUPÝ-dyń Óner, mádenıet jáne sport ınstıtýty dırektorynyń tárbıe jumysy jónindegi orynbasary boldy. Búginde ýnıversıtet murajaıynyń meńgerýshisi bolyp eńbek etedi. QR Sýretshiler odaǵynyń múshesi.
Jaqynda sýretshini áńgimege tartqan edik. Keıipkerimiz kúres jáne palýandar taqyrybynda sýretterdi sala bastaǵanyna shamamen on jyl ýaqyt bolǵanyn aıtty.
«Buǵan deıin basqa da natıýrmort, peızaj, portretterdi, ańshylyq taqyrybynda sýretterdi salǵanmyn. Meniń sýretterim kenep betinde maıly boıaýmen salynǵan. Jeke sheberhanam joq, ózim qyzmet etip júrgen ýnıversıtettiń aýdıtorııasyn sheberhana retinde paıdalanamyn. Men Qanafııa Teljanov, Salıhaddın Aıtpaev, Jańataı Shardenov sekildi qazaq sýretshilerin álemdegi eń myqty sýretshilerdiń qataryna kiredi dep aıta alamyn», — deıdi Erkin Qaıshybek.
Onyń aıtýynsha, jaqsy sýretshi bolý úshin aldymen sýret salýdy jaqsy kórý kerek, mańaıyńdaǵy qorshaǵan álemge ǵashyq bolý kerek, ony shynaıy taza kózqaraspen qabyldaǵan durys.
«Sýret salý barysynda erekshe bir álemge kiresiń. Neshe túrli alasapyran kúı keshesiń, keıin salǵan sýretiń óz oıyńnan shyqsa, odan erekshe lázzat alasyń. Ustaz sýretshi retinde meniń salǵan árbir kartınamnyń tárbıelik máni bolýy kerek dep sanaımyn. Sol sebepti sýrettegi keıipkerlerim óskeleń urpaqqa úlgi bolyp, baı rýhanı tárbıeni berýin qalaımyn. Jalpy, sýret salý adamǵa estetıkalyq, mádenı tárbıe beredi jáne obrazdyq, shyǵarmashylyq oılaý qabiletiniń damýyna jaqsy áser etedi», — deıdi sýretshi.
Erkin Qaıshybektiń bir ul, bir qyzy jáne eki nemeresi bar.
«Otbasyma kelsek bir ul, bir qyzym, eki nemerem bar. Olardyń qaısysy men sekildi sýretshi bolǵysy keletiniń bilmedim. Qazir Almatyda turyp jatyrmyn. Abaı atyndaǵy Qazaq ulttyq pedagogıkalyq ýnıversıtetiniń murajaıynyń meńgerýshisi bolyp eńbek etip júrmin. Sýret salýdan bólek sportpen shuǵyldanamyn», — dedi keıipkerimiz.
Aıta keteıik, Erkin Qaıshybektiń salǵan kúsh atasy Qajymuqannyń portretteri jáne palýannyń ómir tarıhynan syr shertetin kartınalary Túrkistan oblysynyń Qajymuqan Muńaıtpasov atyndaǵy sport murajaıyna qoıylǵan. Sonymen qatar, jaqynda Almatyda kúres sporty sheberleriniń beıneleri somdalǵan kórmesi ótken edi.
QR Sýretshiler odaǵynyń múshesi Erkin Qaıshybek QR Bilim jáne ǵylym mınıstrliginiń alǵys hat, Qurmet gramotalary jáne medaldarymen marapattalǵan.