Sýretshi Benksı alǵash ret jeke kórmesin ótkizedi

GLAZGO. QazAqparat - Brıtan sýretshisi ári belsendi Benksı sońǵy 14 jylda alǵash ret resmı jeke kórmesin ótkizedi, dep habarlaıdy QazAqparat BBC agenttigine silteme jasap.

Aldaǵy senbi, 17 maýsymda Glazgo qalasyndaǵy zamanaýı óner galereıasynda Benksıdiń kórmesi ashylady.

Kórmege kelýshiler sýretshiniń osy ǵasyrdyń basynan beri salǵan graffıtıleriniń avtorlyq kóshirmelerin kóre alady.

Kartınalaryn «klondaý» úshin Benksı túpnusqa týyndyny jasaǵan kezde qoldanǵan trafaretti qaıta paıdalanǵan.

Benksı týyndylaryn sońǵy ret 2015 jyly Sommerset graftyǵynda ózi uıymdastyrǵan Dismaland jobasy aıasynda kórsetken. Degenmen bul ujymdyq kórme boldy, oǵan elý avtordyń jumystary qoıyldy.

Glazgodaǵy kórmede Benksıdiń graffıtıin ǵana emes, sonymen qatar ony salýǵa qoldanylǵan trafaretterdi de kórýge bolady. Olar graffıtıdiń janyna qoıylady.

Brıtandyq kóshe sýretshisi áli kúnge deıin aty-jónin baspasózden jáne kópshilikten qupııa saqtap keledi. Onyń syrtqy kelbeti qandaı ekeni de belgisiz. Benksı sońǵy ret 2003 jyly betin jaýyp, «betpe-bet» suhbat bergen edi.

Ol qazir shamamen 50 jasta jáne Brıstolde týyp-ósken degen boljam bar.

Sýretshi aldaǵy kórmege oraı jarııalaǵan jazbasynda qylmystyq qýdalaýdan qorqatyndyqtan jeke basyn jasyryp júrgenin aıtty.

Dál sol sebepti qandaı da bir múlikke zııan keltirdi degen aıyp taǵylsa, zattaı aıǵaq retinde tanylmas úshin trafaretterin uzaq jyldar boıy tyǵyp ustaǵan.

«Alaıda ol ýaqyt ótken sııaqty, endi olardy kórkem galereıada táýelsiz óner týyndysy retinde kópshilikke usynyp otyrmyn. Shynymdy aıtsam, onyń qaısysy aýyr qylmys ekenin ózim de bilmeımin», - dep jazady óner ıesi.

Sýretshiniń álemniń onshaqty qalasynda salǵan týyndylarynyń bir de bir túpnusqasy osy kúnge deıin saqtalmaǵan.