Sýretke túsýge tyıym salynady: «Shymbulaq» shańǵy kýrorty narazylyqqa jaýap berdi
Almaty qalasynyń turǵyny Darıa Dýnıch Facebook-taǵy jeke paraqshasynda demalys kezinde taýda sýretke túsýge tyıym salynǵanyn jazdy. Aıtýynsha, Medeý sportkesheni aýmaǵynda jáne «Shymbulaq» taý shańǵysy kýrortynda sýretke túsýge tyıym salynǵan.
«Barlyǵy Medeýden bastaldy. Keremet taýlar aıasynda foto jasaǵymyz keldi. Janymyzǵa bir qyzmetker taıanyp, foto túsirýge ruqsat qaǵazyn surady. Qandaı da bir kásibı fotosessııa jasaýdy josparlamaǵandyqtan, árıne, ruqsat qaǵazy bizde bolǵan joq.
Keıin fýnıkýlermen Shymbulaqqa kóterile bastadyq. Endi ǵana shyǵyp edik, fotoapparatty kórgen qyzmetker janymyzǵa kelip, bizde kásibı fotoapparat bar ekeni týraly óz telefonyna vıdeo túsire bastady», - dep jazady ol.
Taýda foto jasaý máselesine qatysty QazAqparat joldaǵan saýalǵa «Shymbulaq» taý shańǵysy kýrortynyń baspasóz qyzmeti jaýap berdi.
Málim etilgendeı, kýrort aýmaǵynda foto jáne vıdeo túsirýge qatysty erejeler bar. Máselen, kásibı foto jáne vıdeo túsirilimdi júzege asyrý úshin, sonyń ishinde ushaqtardy (drondardy), kez kelgen áýe modelderin ushyrý, konstrýktorlardy paıdalaný úshin taý kýrortynyń ákimshiliginiń aldyn ala ruqsaty qajet. Sebebi bul jekemenshik aýmaq.
«Sonymen qatar resmı ruqsatsyz kýrort qyzmetkerleri árbir túsirilimniń kommertsııalyq emes, qonaqtardyń jeke paıdalanýyna arnalǵanyn únemi teksere almaıdy. Foto jáne vıdeo túsirýge ruqsat alý úshin «Medeý» nemese «Shymbulaq» stansasyndaǵy aqparat ortalyǵyna habarlasý kerek. Nemese resmı saıtty paıdalanyp, foto jáne vıdeo túsirýge ruqsat alýǵa ótinish berý qajet. «Shymbulaq» aqparat ortalyǵy ruqsat berý ótinishin jedel túrde qaraıdy. Al saıt arqyly ruqsat alý bir saǵat ishinde júzege asyrylady», - dep atap ótti «Shymbulaq» taý shańǵysy kýrortynyń baspasóz qyzmetinen.
Sondaı-aq demalys ornynyń qonaqtary telefon kamerasyna erkin sýretke túse alatyny habarlandy.