Sýrdlımpıadada júlde alǵan QR sportshylary men bapkerler úshin syıaqyǵa 3,6 mlrd teńge bólinedi

NUR-SULTAN. QazAqparat – Brazılııada ótken XXIV jazǵy Sýrdlımpıada oıyndarynan júldeli oralǵan Qazaqstan sportshylaryna birjolǵy tólem berý úshin Úkimet rezervinen 3,6 mlrd teńge bólinýi múmkin. Mundaı derekter Mádenıet jáne sport mınıstriniń «Ashyq» NQA saıtynda jarııalanǵan tıisti qaýlysynda kórsetilgen, dep habarlaıdy QazAqparat tilshisi.

«Bıyl Brazılııanyń Kashıas-dý-Sýl qalasynda ótken XXIV jazǵy Sýrdlımpıada oıyndarynda joǵary nátıje kórsetken sportshylar men jattyqtyrýsharǵa birjolǵy tólemder berý úshin QR Úkimeti rezervinen 3 610 586 265 teńge mólsherinde qarajat bólinsin.

Qoldanylyp jatqan sharalar sportshylardyń daıyndyǵyn jańa deńgeıge kóterýge jáne halyqaralyq jarystarda tabysty óner kórsetýin qamtamasyz etýge múmkindik beredi», - dep jazylǵan qujatta.

Sonymen qatar qaýlyda Sýrdlımpıada oıyndarynyń jeńimpazdary jáne júldegerleri men olardyń jattyqtyrýshylaryna beriletin qarajat somasy kórsetilgen. Oǵan saı, eń qomaqty syıaqy atalǵan týrnırde І oryn ıelengen jeńil atlet Farhad Kystaýbaevqa berilýi múmkin – 110 652 500 teńge.

Al ІІ oryn úshin – 66 957 000 teńge, ІІІ oryn úshin 32 585 250 teńge syıaqy taǵaıyndalǵan. Eń az mólsherdegi syıaqyny Sýrdlımpıadada 6-orynnan kóringen tórt sportshyǵa berý josparlanǵan. Olardyń árqaısysyna usynylatyn qarajat – 2,1 mln teńge.