Sýrdlımpıada oıyndary: Shahmattan Qazaqstan qurama komandasy qola júlde jeńip aldy

<p>ASTANA. KAZINFORM &ndash; XX qysqy Sýrdlımpıada oıyndarynda Qazaqstan erler qurama komandasy klassıkalyq shahmattan 10 upaı jınap, qola medalǵa ıe boldy.</p>

Atalǵan jarysta altyn júldeni 12 upaı jınaǵan Horvatııanyń sportshylary jeńip alsa, kúmis medal 11 upaı jınaǵan Polsha komandasyna buıyrdy.

Ulttyq qurama sapynda Sultan Qojahmetov, Samajan Kettebekov, Maksım Rojkov, Amangeldi Naýryzǵalıev, Meıirman Perneev jáne Vıktor Maksımenko oınady.

«Klassıkalyq shahmattan jarys qyzý ótti, qarsylastarymyz osal bolmady. Oıyn barysynda elimizdiń sportshylary Italııa, Germanııa jáne Serbııa qurama komandalaryn jeńip, Ýkraına men Polsha komandalarymen teń oınap, tek Horvatııa komandasyna ese jibergen bolatyn. Jarystyń nátıjesinde komandamyz 7 týrdan ótip, on úsh komanda arasynda úshinshi orynǵa turaqtady», - dedi shahmattan aǵa jattyqtyrýshy Eldos Kúzerbaev.

Aıta ketsek, XX qysqy Sýrdlımpıada oıyndary Túrkııanyń Erzýrým qalasynda 2-12 naýryz aralyǵynda ótti. Jarysqa Qazaqstan tarapynan 26 sportshy shahmattan, snoýbordtan jáne shańǵy jarysynan qatysty.