Suranysqa ıe mamandyqtardy meńgerýge arnalǵan qandaı baǵdarlamalar bar

<p>ASTANA. KAZINFORM &ndash; Astana turǵyndarynyń biliktiligin rastaýǵa jáne suranysqa ıe salalarda qajetti daǵdylardy alýǵa kómektesetin birneshe baǵdarlama iske qosyldy. Bul týraly Kommýnıkatsııalar qyzmetinde ótken brıfıngte Astana qalasy ákimdiginiń &laquo;Eńbek mobıldiligi ortalyǵy&raquo; dırektory Omar Oljas aıtty.</p>

Spıkerdiń aıtýynsha, Career Enbek platformasynda tirkelgen jumyssyzdarǵa arnalǵan jańa fýnktsııa iske qosyldy. Ol arqyly IT salasyndaǵy kásibı biliktilikti tegin rastaýǵa arnalǵan vaýcherler alýǵa bolady. Bul — jelilik ákimshi, júıelik taldaýshy, aqparatty qorǵaý ınjeneri jáne basqa da mamandyqtarda jumys istep júrgen nemese damýdy josparlap otyrǵan mamandar úshin úlken múmkindik.

«Protsedýra óte qarapaıym. Bizdiń Eńbek mobıldiligi ortalyǵymyz mamandyq tańdaýdan bastap, Career Enbek platformasynda ótinish berýge deıingi barlyq kezeńde kómektesedi. Biz ótinish berýden bastap, kásibı biliktilikti rastaý ortalyǵynda emtıhan tapsyrýǵa deıingi búkil protsesti qadaǵalaımyz. Emtıhan teorııalyq jáne praktıkalyq tapsyrmalardan turady, ony sátti aıaqtaǵannan keıin biliktilikti rastaý týraly qujat beriledi», — deıdi Omar Oljas.

Oǵan qatysý úshin kelesi qadamdardy oryndaý qajet:

1. Eńbek mobıldiligi ortalyǵy tirkelgen jumyssyzdardyń arasynan úmitkerler sanyn anyqtap, mamandyq pen akkredıttelgen biliktilikti rastaý ortalyǵyn tańdaýǵa keńes beriledi.

2. Sodan keıin Career Enbek platformasynda tirkelýge jáne ETsQ arqyly vaýcher alý úshin ótinish berýge kómek kórsetiledi.

3. Ótinish maquldanǵannan keıin vaýcher jeke kabınetińizde paıda bolady, sodan keıin biliktilikti rastaý protsedýrasynan óte alasyz.

Ortalyq basshysy óz sózinde Enbek.kz portalynda 2025 jylǵa arnalǵan eki negizgi baǵdarlamaǵa qatysý úshin 31 qazanǵa deıin ótinimder qabyldanatynyn aıtty.

Olar:

1. Jastar praktıkasy — bul baǵdarlama túlekterge alǵashqy kásibı tájirıbe jınaqtaýǵa, al jumys berýshilerge — bilim alýǵa daıyn, jigerli qyzmetkerler tabýǵa múmkindik beredi. Sonymen qatar, Astana qalasynyń Eńbek mobıldiligi ortalyǵy ótken jyldary jumysqa ornalasý tájirıbesiniń qorytyndylary boıynsha qatysýshylardyń turaqty jumys oryndaryna ornalasýyn eskeredi.

2. Qoǵamdyq jumystardy uıymdastyrý — bul joba jumyssyzdardy ýaqytsha jumyspen qamtýǵa baǵyttalǵan. Qoǵamdyq jumystarǵa qatysý uzaqtyǵy 12 aıdan aspaıdy. Qoǵamdyq jumystarǵa qatysý quqyǵyna jumyssyzdar, jazǵy demalys kezinde densaýlyqqa zııan keltirmeıtin jáne oqý protsesine kedergi keltirmeıtin jaǵdaıda jalpy bilim beretin mektepterdiń joǵary synyp oqýshylary, sondaı-aq bos turyp qalý saldarynan jumyspen qamtylmaǵan tulǵalar ıe.

Buǵan deıin Eńbek jáne halyqty áleýmettik qorǵaý mınıstri Svetlana Jaqypova elimizde kimder jumyssyz dep sanalmaıtynyn túsindirgen bolatyn.

Sonymen qatar depýtat Ashat Aımaǵambetov Qazaqstanda tolyq jumys kúni eńbek etse de, jalaqysy kedeılik sheginen asa almaıtyn adamdar bar ekenin aıtqan edi.