«Sur tizim»: Rýslan Dálenov Qazaqstannyń EAEO aıasyndaǵy eksport problemalaryn atady

NUR-SULTAN. QazAqparat – Ulttyq ekonomıka mınıstri Rýslan Dálenov Eýrazııa ekonomıka odaǵy aıasynda Qazaqstan eksportyn shektep turǵan basty problemalardy atady, dep habarlaıdy QazAqparat tilshisi.

«Qazir birqatar másele bar. Biz olardy «sur tizim» dep ataımyz. Oǵan alkogoldi ónimder, aktsızdi ónimder, antıdempıngti salyqty tergeý, básekege qabiletti usyný máseleleri kiredi. Onyń bárin durystap zerttep, qarastyrý kerek. Oǵan qatysty suraqtar burynnan týyndap keledi. Taǵy biri – memlekettik satyp alý, memlekettik satyp alýǵa qoljetimdilik, ártúrli aqparattyq júıeler men tsıfrlyq qoltańbalar. Munyń bári - básekege qabilet máselesi. Ártúrli kásiporynda ondaı másele bar. Onyń bári álbette Eýrazııa ekonomıkalyq komıssııada qaralyp jatyr. QQS boıynsha stavka ártúrli. Reseıdegi QQS-tiń joǵary stavkasy meniń oıymsha eksportty yntalandyrmaıdy – basqa elderden taýardyń kirip ketpeýin qadaǵalaıdy», - dedi Rýslan Dálenov Parlament Senatynyń otyrysynda.

Mınıstr bul turǵyda óz oıyn bildirdi.

«Reseı Federatsııasy kez kelgen taýardy shekarada 20 paıyzdyq qosymsha qunmen kútip alady. Al Qazaqstanda ımporttyq taýarlar boıynsha bul stavka 12 paıyz. Bul turǵyda stavkasy joǵary memlekette basymdyq bolýy múmkin. Ekinshi jaǵynan eksport kezinde eksport týraly rastalatyn qujat alý qıyn, ıaǵnı nóldik stavkany paıdalaný kúrdeli. Eger kásiporyn shaǵyn bolsa, Qazaqstandaǵy kontr-seriktes taýardy RF-dan alyp kele jatqanyn rastaýy kerek. Reseılik eksporter úshin nóldik stavkany paıdalaný árdaıym sátti bola bermeıdi. Sol sebepti olardyń taýary boıynsha stavka 20 paıyz bolyp qala beredi», - dedi ol.

Rýslan Dálenov Qazaqstandaǵy 12 paıyzdyq stavka eksportqa ónimdi shyǵarýǵa jol ashatynyn aıtyp ótti.

«Nóldik stavkany qalamaıtyndar 12 paıyzben ótedi. Qazaqstandyq kásipkerlerde jalpy RF-ǵa ónimin eksporttaýda basymdyq bar», - deıdi Rýslan Dálenov.