Suńqyldaq aqqýdy Qyzyl kitapqa engize almaımyz — ornıtolog
«Suńqyldaq aqqý erekshe qorǵaý mártebesin qajetsinbeıdi. Óıtkeni, aqqýdyń bul túriniń sany kóp. Ony Qyzyl kitapqa engize almaımyz. Mynadaı ólshemsharttary bar: sanynyń az bolýy, tirshilik etý ortasynyń tarlyǵy, sanynyń kúrt azaıýy. Suńqyldaq aqqý bul ólshemsharttarǵa saı emes. Degenmen, ony aýlaýǵa tyıym salynǵan. Kaspıı óńiri suńqyldaq aqqýdyń álemdik popýlıatsııasy úshin mańyzdy rólge ıe. Biz sáýir, maýsym jáne qazan aılarynda keminde 4 ekikúndik aýdıo-vızýaldy esepke alý júrgizemiz. Ótken jyldyń qazan aıynyń sońynda Itbalyq araly aýdanynda 80 myń suńquldaq aqqý túrin esepke alǵan edik. Al taıaýda 32 myń aqqýdy eseptedik. Qalǵandary Túrikmenstan men Iranǵa ushyp ketti», — dedi ol Mańǵystaý oblystyq qoǵamdyq kommýnıkatsııalar ortalyǵynda ótken Qarakól kólindegi aqqýlardyń qyrylýyna qatysty brıfıngte.
Onyń aıtýynsha, táýelsiz 3 zerthanada ótkizilgen saraptama nátıjesi atalǵan kóldegi aqqýlardyń qyrylýyna qus tumaýy sebep bolǵanyn kórsetip bergen.
Negizinen balapan qustar ólgen.
«Bizdiń baǵalaýmyzsha, ár qysta Mańǵystaý jaǵalaýyna shamamen 50 myń suńqyldaq aqqý, Qyzyl kitapqa enggen 200-300 qıqyldaq aqqý qystaıdy. Sonymen qatar sońǵy ýaqytta Qyzyl kitapqa kirgen kishkentaı aqqý paıda boldy. Buǵan deıin aqqýlardyń jappaı qyrylýyn baıqamaǵan edik. Biraq, qus tumaýynan qustardyń basqa túrleri jappaı qyrylǵanyn kórdik. 2015 jyly qus tumaýynan bir topta uıa basqan buıra birqazan qyrylyp, qyzǵylt birqazan aman qaldy. Eki jyl buryn qarabas ógiz shaǵala men úlken qarqyldaq shaǵala jappaı qyryldy. Sol ýaqytta onyń sebebi munaıdyń tógilýi degen boljam bolǵan edi. Biraq, úkimettik komıssııa qus tumaýynyń sebep bolǵanyn anyqtady. Kaspııdiń reseılik bóliginde, Jerorta teńizinde jáne álemniń basqa bóligindegi Mıchıgan kóliginde úlken qarqyldaq shaǵala jappaı qyrylǵan edi. Bul — oqtyn-oqtyn bolyp turatyn jaıt», - dedi ornıtolog.