Súndet Baıǵojın Qostanaı oblystyq fılarmonııasynyń basshysy qyzmetinen ketti
Ótken jyldyń qyrkúıek aıynda týǵan jerine kelgen Súndet Baıǵojın Qostanaıdaǵy oblystyq fılarmonııany basqardy. Búgin «Astana Operanyń» burynǵy solısiniń bul qyzmetten óz erkimen ketkendigi belgili boldy.
Aıta keteıik, jýyqta áleýmettik jelilerde jáne jergilikti buqaralyq aqparat quraldarynda S.Baıǵojınniń ketýine fılarmonııa ujymynyń keıbir múshelerimen ortaq til tappaýy sebep bolýy múmkin degen jazbalar men materıaldar jarııalana bastaǵan edi.
Osyǵan baılanysty oblystyq Mádenıet basqarmasynyń basshysy Erlan Qalmaqov arnaıy ótkizilgen brıfıng barysynda málimdeme jasady.
«Súndet Ábdirahmanuly - Qazaqstanda ǵana emes, basqa elderde de tanymal tulǵa. Ol óte daryndy, bedeldi jáne tájirıbeli adam. Onyń bul qasıetteri jáne kásibı sheberligi qoǵam tarapynan árqashan joǵary baǵalanyp keledi. Álbette, S.Baıǵojınniń jumystan shyǵýyna ne túrtki bolǵandyǵy týraly santúrli oı týyndaýy múmkin. Biraq osyndaı tanymal adamdy aryz jazdyrýǵa eshkim májbúrleı almaıtyndyǵy anyq. Ekinshiden, onyń shyǵarmashylyqpen aınalysatynyn umytpaǵan jón. Qazirdiń ózinde ol elordadaǵy televızııalyq jobanyń túsirilimine qatysýda», - dedi ol.
12 naýryzda fılormonııa ujymynyń bir top ókili «Súndet Baıǵojındi qaıtaryńyzdar» dep jazylǵan plakattarmen mekeme aldyna shyqqan. Sondaı-aq oblys ákimi Arhımed Muhambetovke ujymdyq úndeý jazylǵandyǵy belgili boldy. E.Qalmaqovtyń aıtýynsha, bul úndeý qoldanystaǵy zańnama aıasynda qaralalady.