Súmólók, palaý, samsa – ózbekstandyqtar Naýryzdy qalaı toılaıdy

TAShKENT. QazAqparat - Ózbekstan astanasynda Naýryz meıramy keń kólemde toılanýda, dep habarlaıdy QazAqparat tilshisi.

Tashkenttegi jappaı halyqtyq merekeler qalanyń barlyq jerinde – Anhor, Ashgabat, Central Park, Tashkent City Park, Magic Sity jáne basqa da tanymal oryndarda ótip jatyr.

Folklorlyq-etnografııalyq toptar án aıtyp, bı bılep ózbek ulttyq mádenıetiniń baı murasyn kórsetti.

Arqanmen júrýshiler, ulttyq kıimder kórsetilimi, halyq qoldanbaly óneriniń kórmesi, balalardyń kóńildi bıleri barshaǵa qýanyshty kóńil-kúı syılaýda.
Kóktemniń kelýin toılaý ózbek ashanasynsyz ótpeıdi. Otta - palaý, tandyrda - samsa, tostaǵanda - kók shaı jáne Naýryzdyń basty taǵamy - súmólók. Bul kóne zamannan belgili, úlken qazanda kúni boıy janyp turǵan otta pisiriletin, kóktep shyqqan bıdaı dáninen jasalatyn taǵam. Ańyz boıynsha, Ortalyq Azııaǵa qonystanǵan alǵashqy adamdar sýyq jáne uzaq qystan ázer shyqqan. Kóktemgi egiske daıyndalǵan astyq qorynan basqa jeıtin eshteńe qalmaǵan. Ylǵaldan sýlanǵan jáne kóktep ketken dánderdiń birazyn qaınatýǵa týra keledi. Daıyn bolǵan taǵamnyń qunarlyǵy joǵary bolyp, adamdarǵa ómir men jańarý úshin kúsh beredi-mis. Sodan beri kóktemgi kún men túnniń teńelýine arnap súmólók qaınatý dástúrge aınalǵan.