Sýmen qamtamasyz etý jelileri baıaý jóndelip jatqan oblystardyń tizimi jarııalandy

ASTANA. QazAqparat – Elimizde sýmen qamtamasyz etý jelileriniń 60 paıyzy jóndeldi. Bul týraly Indýstrııa jáne ınfraqurylymdyq damý vıtse-mınıstri Іlııas Ospanov aıtty, dep habarlaıdy QazAqparat tilshisi.

«Sýmen qamtamasyz etý jelileri boıynsha 1,5 myń shaqyrymdy jóndeý josparlanǵan, onyń ishinde 921 shaqyrym nemese 60,5% jóndeldi. Basqa aımaqtarmen salystyrǵanda tómen qarqyn Mańǵystaý oblysynda (19,6%), Almaty qalasynda (21,3%) jáne Qyzylorda oblysynda (35,2%) baıqaldy», - dedi І.Ospanov Úkimet otyrysynda.

Onyń aıtýynsha, sý burý jelileri boıynsha 236 shaqyrymdy jóndeý josparlanǵan, onyń ishinde 127 shaqyrymy nemese 53,8% jóndeldi.

«Túrkistan jáne Jetisý oblystarynda jóndeý jumystary múldem josparlanbaǵan. Jumystyń tómen qarqyny Qyzylorda (0%), Mańǵystaý (4,8%) oblystarynda jáne Astana qalasynda (27,8%) anyqtaldy», - dedi vıtse-mınıstr.

Budan buryn habarlanǵandaı, aldaǵy jylý berý maýsymyna daıyndyǵy tómen óńirler ataldy.

Sonymen qatar bıylǵy 7 aı ishinde 61 mln 700 myń tonna kómir óndirildi. Onyń ishinde kommýnaldyq-turmystyq qajettilikterge jáne halyqqa 3 mln 900 myń tonnaǵa jýyq jóneltildi.