Sýma Chakrabartı Prezıdenttik jastar kadrlyq rezerviniń múshelerine keńesterin berdi
Klýbtyń búgingi alǵashqy qonaǵy Memleket basshysy Qasym-Jomart Toqaevtyń shtattan tys keńesshisi, Prezıdent janyndaǵy reformalar jónindegi joǵary keńes tóraǵasynyń orynbasary jáne Eýropa qaıta qurý jáne damý bankiniń eks-prezıdenti Ser Sýma Chakrabartı boldy.
Sýma Chakrabartı óziniń jumysy týraly egjeı-tegjeıli baıandap, kóshbasshylyq týraly paıymdaryn ortaǵa saldy, klýb músheleriniń suraqtaryna jaýap berdi.
Prezıdent keńesshisi áńgime barysynda eldegi jańǵyrý protsesterindegi jastardyń róline kóbirek toqtaldy.
«Sizder búginniń ózinde kóshbasshysyzdar. Odan da mańyzdysy, kelekshektiń kóshbasshysysyzdar», - dep bastady áńgimesin Ser Chakrabartı.
Eki saǵatqa sozylǵan suhbat barysynda Sýma Chakrabartı klýb músheleriniń saýaldaryna jaýap berip, strategııalyq josparlaý, aýmaqtyq damý, memlekettik basqarý júıesi, Qazaqstan ekonomıkasyna ınvestıtsııalardyń ulǵaıýy jáne basqa da taqyryptar tóńireginde áńgime órbitti.
Prezıdenttik jastar kadrlyq rezerviniń músheleri Ser Chakrabartıdiń saraptamalyq pikirin qorytyp, talqylanǵan máseleler men usynystardy iske asyrý tetigin qosymsha qarastyryp, daıyndaýdy josparlap otyr.
«Prezıdenttik jastar kadrlyq rezerviniń músheleri – Qazaqstannyń patrıot azamatttary. Qoǵamnyń ál-aýqatyn arttyrý jáne ómir súrý sapasyn jaqsartýdy, memlekettik qyzmet kórsetýdiń tıimdiligin qamtamasyz etýdi birinshi orynǵa qoıamyz. Ol úshin biz barlyq qoljetimdi syndarly alańdardy ashyq dıalog retinde paıdalanýǵa daıynbyz. Bizdiń rezervtegi áriptesterimiz óskeleń urpaq pen aldyńǵy býyn arasyndaǵy, memleket pen bıznes arasyndaǵy baılanystyrýshy býynnyń rólin atqaryp otyr. Memlekettik qyzmettiń alańynda júrgendikten protsesterdegi, strategııalardaǵy qıyndyqtardy kórip, túsinip otyrmyz jáne osy ózgeristerge óz úlesimizdi qosa alamyz», - deıdi klýb moderatory Aıdyn Baıedılov.
Klýb músheleri de bul kezdesý kókeıdegi kóptegen saýalǵa jaýap bergenin aıtady.
«Jalpy, ashyq jáne taǵlymdy áńgime órbidi. Munda aıtylǵan negizgi ıdeıalar bolashaqta qabyldanatyn sheshimderge negiz bolady. Bul bizdiń rezerv múshelerin yntalandyrady jáne shabyttandyrady», - deıdi jas maman Ásel Sársenbaeva.
Rezervtiń taǵy bir múshesi Almat Ahmatolla da óz oıyn aıtty.
«Prezıdenttik jastar kadrlyq rezervi bastamashyl jastardy biriktirip, olarǵa Qazaqstandaǵy úderister men turaqty damýdy odan ári jetildirý úshin baılanys, pikir almasý alańyn usynyp», - deıdi Almat.
Uıymdastyrýshylar sharany koronavırýs ınfektsııasynyń taralý qaýpin azaıtýdy kózdeıtin barlyq sanıtarlyq-profılaktıkalyq sharalardy saqtaı otyryp ótkizgenin aıtý kerek.