Sulýlyqtyń sımvoly tek áıel emes – Qazaqstandyq erler ózine qandaı kútim jasaıdy
«Dermaexpert» klınıkasynyń dermatolog-dárigeri, dermatokosmetolog Erken Daıyrovtyń aıtýynsha, qazirgi ýaqytta erler de bet kútimine mán bere bastady.
«Bizdiń klınıka eresekter men balalar terisin emdeýge mamandanǵan jáne emdeýge jan-jaqty turǵydan qaraımyz. Adam terisi — kóptegen fýnktsııalardy oryndaıtyn eń úlken aǵza. Teri adamnyń densaýlyǵy men sulýlyǵyn kórsetedi. Qazir erler kosmetologııasyndaǵy tendentsııalar qarqyn alyp keledi, erler de taza, saý terini qalaı bastady. Kóbinese erkekter men jasóspirimder betindegi bórtpe, bezeý tyrtyqtary, pıgment, qan tamyrlarynyń kórinýi máselelerimen júginedi. Ádette bizge 15-45 jastaǵy er jigitter kóbirek keledi, degenmen 45-ten asqan erler de jasartatyn protsedýralarǵa keledi, óıtkeni bet-álpet — adamnyń vızıt kartasy ispettes», — deıdi E. Daıyrov.
Dárigerdiń aıtýynsha, eń aldymen, erler kosmetologııasy — bórtpesiz, bezeýsiz saý teri. Qoǵamda erler kútimine baılanysty stereotıp qalyptasqan jáne kóp jaǵdaıda bilimsizdikten terige kútim jasalmaıdy. Saldarynan teri tez qartaıady, jasópirim kezde shyqqan bezeý-bórtpelerdiń tyrtyǵy qalady.
Tulip Medicine estetıkalyq hırýrgııa klınıkasynyń atqarýshy dırektory Qarlyǵash Temirbolat erlerdiń bet kútiminen bólek, tersheńdikten arylý, shash transplantatsııasy, qulaq pen muryn otalaryn jasatynyn aıtty. Oǵan qosa, erlerdiń uzaq emdeý kýrstaryn unatpaıtynyn, lezde estetıkalyq áserdi qalaıtynyn atap ótti.
«Erlerdiń áıelderden aıyrmashylyǵy — tez áser etetin protsedýralardy jaqsy kóretininde. Mysaly, bet ájimderin ketirý nemese emdeý kezinde botýlıným terapııasy nemese botoks sııaqty protsedýralardy erler jıi jasatady. Sondaı-aq, erler gıpergıdrozdy nemese alaqannyń, óksheniń jáne qoltyqtyń shamadan tys terleýin emdetýge jıi keledi. Bul másele erlerde jıi kezdesedi jáne jumysta, sportpen shuǵyldanýda, jaqsy kıim kııýde kedergi keltiredi. Ásirese Astanadaǵy keńse qyzmetkerleri arasynda bul protsedýra óte tanymal, óıtkeni olar únemi kóılek kıip, mańyzdy is-sharalarǵa qatysady», — deıdi Q. Temirbolat.
Sondaı-aq, klınıka basshysy er adamdardyń shash qalyńdyǵyna basa kóńil bóletinin atap ótti. Buryn shash transplantatsııasy tek shetelde, atap aıtqanda Túrkııada qoljetimdi bolsa, qazir elorda klınıkalary da bul qyzmetti usyna alady. Anaǵurlym kúrdeli estetıkalyq protsedýralar ishinde qulaq pen muryn pishinin ózgertý úshin otoplastıka men rınoplastıka otalary erler arasynda óte kóp suranysqa ıe.
«Erler áıelderge qaraǵanda tártippen júrip-turady, ádette olar naqty bir problemamen keledi. Dárigerdiń aıtqanyn buljytpaı oryndaıdy, emge turaqty túrde merziminen keshikpeı keledi. Tipti jumys kestesinde dárigerdiń qabyldaýyn aldyn-ala josparlaıdy, sońǵy sátte josparyn ózgertpeıdi. Er naýqastyń dárigerge boı úıretýi úshin biraq ýaqyt qajet, belgili bir dárejede senim paıda bolǵansha erlermen jumys isteý ońaıǵa soqpaıdy. Olar aýyrsyný protsedýralarynan qorqady, mezoterapııa ınektsııalyq protsedýralarǵa shydamaıdy. Bul rette áıelder anaǵurlym senimdirek jáne jańa protsedýralar men ádisterge daıynyraq bolady», deıdi Qarlyǵash Temirbolat.
Kelesi keıipkerimiz Rústem Sımtıkov «VELVET» permanentti makııaj stýdııasyn basqarady jáne erlerdiń qandaı sulýlyq protsedýralaryn jıi tańdaıtynyn aıtyp berdi.
«Bizdiń stýdııaǵa er klıentter lazerli epılıatsııa, emdik massaj, qas pen eringe permanentti boıaý jáne kosmetologııalyq qyzmetterdi alýǵa keledi. Epılıatsııa jasaýda erlerden kóbirek aqy alamyz, óıtkeni olardyń denesinde túk kóp. Jalpy qazaqstandyq erlerdiń kútine bastaǵany meni qýantady. Ókinishke qaraı, bizde er adamdarda kompleks kóp, óte tuıyq, kıimine mán bermeıdi. Adam ózin jáne óziniń tánin jaqsy kórýi kerek. Tıisinshe, qazir erler joǵaryda atalǵan protsedýralarǵa jıi kele bastady. Men de ózimdi jaqsy kóremin jáne kútimimnen aqsha aıamaımyn», — deıdi R. Sımtıkov.
Sonymen birge, spıker ishki jáne syrtqy sulýlyqtyń teń bolýyn, sportpen shuǵyldanyp, durys tamaqtanýdyń mańyzdy ekenin, kosmetologııalyq jáne medıtsınalyq qyzmetter de qoljetimdi ekenin jetkizdi.
«Qazir barlyq múmkindik bar, tek adamnyń ynta-yqylasy bolýy kerek. Erler de ózine qaraýy kerek dep esepteımin, bul avtomatty túrde áıelge aınalyp ketedi degen sóz emes», — dedi spıker.
Psıhoanalız baǵytyndaǵy psıholog Mırgúl Bımaǵambetova erler men áıelderdiń bizdiń qoǵamdaǵy róli týraly keıbir burmalanǵan túsinikterdi eskere otyryp, sulýlyq salondaryna barý jáne ártúrli qyzmetterdi paıdalaný úrdisin qanaǵattanarlyq, tipti «jaqsy» dep baǵalady.
«Erlerdiń ózderiniń syrtqy kelbetine qamqorlyq jasaı bastaýy ishki sulýlyqtan da habar berýi múmkin. Bul jaqsy úrdis. Bizdiń qoǵam uzaq ýaqyt boıy er adam mindetti túrde dóreki, kúshti bolýy kerek, jylamaýy kerek, emotsııa kórsetpeýi kerek, maımyldan sál ádemi bolsa jetedi degen stıgmada ómir súrdi. Munyń bári meniń oıymsha, burmalanǵan qabyldaý. Psıhoanalız teorııasyna sáıkes, ár adamnyń er jáne áıel bóligi, er men áıel gormondary bar. Uzaq ýaqyt boıy er adamnyń názik sezimderine, súıispenshilik pen kóz jasyna tyıym salynyp keldi. Sondyqtan qazirgi erlerdiń syrtqy kelbetine qamqorlyq jasaý úrdisin jaman dep atamas edim. Bálkim, er adamdar áıelderdi osylaı túsine bastaǵan shyǵar. Buryn erler áıeldiń bir aıda manıkıýrge jumsaǵan aqshasyna tań qalsa, qazir ózderi de manıkıýr jasaı bastady. Erler sheberlerdiń eńbegi men qyzmet qunyn túsinetin bolady», — dedi psıholog.
M. Bımaǵambetova orta ǵasyrlarda, bet pen shash kútimi eń sońǵy orynda turǵan soǵys jaǵdaıynda turyp jatpaǵanymyzdy, tıisinshe erlerdiń óz kelbetine kóńil bólýi jaqsy dástúr ekenin jetkizdi. Al erlerdiń sán salonyna barǵanyn tis jaryp aıtpaýy, uıalýy qoǵamdyq stereotıpterge tikeleı baılanysty.